In Maart vanjaar is Nagraadse Onderwysstudent, Adriaan Havenga, met twéé Fiёsta-toekennings beloon. Hy is aangewys as die wenner in die kategorieё Beste nuutgeskepte Afrikaanse teks, verwerking of vertaling asook Beste opkomende kunstenaar. Dit was sy eerste nominasies en toekennings.
“Dit was ‘n oorweldigende oomblik, omdat die kategorieë direk na mekaar aangekondig is. Die oorhoofse gevoel wat ek ervaar het, was dankbaarheid en baie adrenalien” vertel Havenga.
Die beste nuutgeskepte Afrikaanse teks wat hy geskryf het, Iewers in die grys, is in 2020 tydens die COVID-pandemie geskryf en nadat dit ‘n paar keer by feeste afgekeur is, het Havenga in 2022 besluit om dit onafhanklik op die planke te bring. Daarna het hy en sy mede-aktrise, René Cloete (ook ‘n oud-Matie), die kans gehad om in 2022 by die Woordfees op te tree, wat verdere deure oopgemaak het.
Iewers in die grys is ‘n drama wat die vriendskap van twee plattelandse skoolleerders ondersoek oor ‘n tydperk van sestien jaar. Dis 2003. Heather is ‘n bruin matriekdogter wat Medies wil gaan studeer en sy en die nuwe wit ou in die skool, Gideon, kliek dadelik, veral wanneer sy besef dat hy ook Medies wil gaan studeer. Hulle word beste vriende, maar oor die jare dreig geheime, jaloesie en rassisme om hulle spesiale verhouding uitmekaar te skeur. Hulle het altwee drome vir die toekoms, maar hoe word ‘n lugkasteel bo gehou in ‘n land waar onregverdigheid en regverdigheid so eenders lyk?
Havenga het drama studeer (2018 – 2020) en daarna vir twee jaar vryskutwerk gedoen. Hy is vanjaar besig met sy Nagraadse Onderwyssertifikaat. “Ek studeer onderwys omdat ek my opsies oop wil hou in terme van werksgeleenthede. Dit sal vir my lekker wees om altyd deel van die vermaaklikheidsbedryf te wees, maar in daardie bedryf is werk nie noodwendig altyd verseker nie. Onderwys kan moontlik vir my die geleentheid gee om in stil seisoene (in terme van die drama-bedryf) steeds ‘n inkomste te verdien. Ek dink ‘n mens kan baie by kinders leer.”
Sy toekomsplanne is in plek, maar hy is bereid om dit te wysig as daar ander goeie geleenthede oor sy pad kom. Aanpasbaarheid en ‘n positiewe ingesteldheid is volgens Havenga baie belangrik. “Stories het die mag om mense diep aan te raak, mense op verbeeldingsvlugte te neem en wêrelde te open. Ek wil graag mense se idees uitdaag, mense inspireer en hopelik ook nog stories vertel wat positiewe verandering bring en wat mense van Jesus vertel.”
- Iewers in die grys is by die Suidoosterfees: 28 April om 20:30 en 1 Mei om 14:30 in die Repteater by Artscape. Kaartjies beskikbaar by Computicket.
- Skrywer: Elbie Els
- Foto: Jonathan Lestrade
