#TuiskomsDeonMeyer: wen ’n getekende eksemplaar van een van Deon Meyer se boeke

Vanjaar se #Tuiskoms is ietwat anders weens die Covid-19-pandemie.
Ons mag nou wel nie op die oomblik fisies na plekke reis nie, maar Maties, maak julle gereed om na ’n ander wêreld te reis met Deon Meyer se nuwe boek, Donkerdrif.

Sluit op Donderdag 23 September om 19:00 by ons aan vir ‘n aanlyngesprek met die hoogaangeskrewe Suid-Afrikaanse skrywer en draaiboekskrywer, Deon Meyer.
Matie-alumnus, Jonathan Amid, bekende boekjoernalis en -kritikus, staan gereed om hierdie gesprek te lei. Deon sal sy reis as ‘n gevierde skrywer met ons deel en sy onlangse topverkoper, Donkerdrif, wat in die pragtige dorp Stellenbosch afspeel, bespreek.
Sy boeke is al in meer as 40 lande gepubliseer en wêreldwyd in 27 tale vertaal.
RSVP: Stuur ‘n e-pos na alumni@sun.ac.za.

WEN!!
In samewerking met Human & Rossouw Uitgewers, bied ons aan tien gelukkige Maties die kans om ’n getekende eksemplaar van een van Deon Meyer se boeke, insluitende Donkerdrif, te wen.

Só doen jy dit:
Neem ’n foto van jouself by een van Deon Meyer se boeke.
Plaas dit op Instagram of Twitter en merk (‘tag’) @matiesalumni met die hutsmerk #TuiskomsDeonMeyer.

***
Die kompetisie sluit op 23 September 2021 om middernag. Die wenner sal op 27 September 2021 op sosialemedia aangekondig word.

Oor hierdie boek:

Iemand skiet vir adjudant-offisier Milo April by die Kaapse Waterfront. Koelbloedig, helder oordag, ’n teregstelling. Is ’n senior SAPD-offisier daarvoor verantwoordelik? En hou dit verband met geheimsinnige briewe wat die geskorste Valke-speurders, Bennie Griessel en Vaughn Cupido, ontvang het? Met ondertone van nóg staatskaping-onheil?

As hulle dit kan ontrafel, is hul loopbane gered, hul status herstel. Maar hoe ondersoek jy ’n saak in die geheim, met jou hele toekoms op die spel as jy uitgevang word?

Terwyl jy boonop jou tyd moet mors met ’n studentjie op Stellenbosch wat skynbaar ná ’n naweek se gefuif tussen neus en ore verdwyn het? En die aapstreke tussen Jasper Boonstra, die superryk, alomberugte korporatiewe swendelaar, en die sensuele, desperate eiendomsagent, Sandra Steenberg . . .

Jy doen maar wat jy altyd doen as jy Griessel en Cupido is. Bekhou, kophou, aanhou. Terwyl jou base raas en die media onmenslike druk op jou plaas. En jy stadigaan besef dit is die donkerste drif wat agter alles sit.