Maties Sport

Die nostalgie wat met Matie-wees gepaardgaan, is uiters spesiaal – daar is net goeie herinneringe aan someraande by die Danie Craven-stadion, gejuig vir die maroenmasjien, of die vinnige aksie van basketbal en netbal in die Coetzenburg-sentrum, om nie eers te praat van rekord-oomblikke by die geskiedkundige Coetzenburg-stadion nie.

Coetzenburg is die hart van die Universiteit Stellenbosch, ongeag of jy ’n sport beoefen het of nie. Jou teenwoordigheid op wedstyd-aande of feitlik, deur die vele aanlyn-geleenthede, is noodsaaklik om die nalatenskap wat oor 100 jaar gevorm is, te laat aanhou groei.

Vandag bied Maties Sport 30 kodes – 11 van hulle hoëprestasie – aan sowat 3 000 studentatlete en dien steeds as die slypskool vir uitnemendheid in afrigting, sportinnovasie en nasionale kampioene.

Tydens die ongekende omstandighede van die afgelope twee jaar het Maties Sport na vore getree as ’n leier onder Suid-Afrikaanse universiteite deur tegnologie te gebruik om aanlyn te verskuif met afrigtingsessies oor kodes, webinars en nasionale kompetisies. In 2022 sal die terugkeer na aksie vinnig en daadwerklik wees sodra COVID-19- beperkings opgehef sou word en ons hoop om ondersteuners terug te verwelkom in ons beroemde stadions. So, bly verbind met Maties Sport, hou jou kalender op datum en vier daai maroen steeds met trots – en onthou … #gooimielies!