Nadat die Universiteit Stellenbosch in 2021 algeheel derde in die Westerse afdeling van die jaarlikse Simon Marais-wiskundekompetisie geplaas is, sal 15 US-studente weer op 15 Oktober 2022 teen studente van 70 universiteite van regoor die wêreld meeding.
Die kompetisie is in 2017 gestig ter ere van wyle dr Simon Marias – ‘n US-alumnus in fisika en batebestuurder by Allan Gray, en later stigter en voorsitter van Allan Gray in Australië. Met ‘n PhD in teoretiese fisika aan die Universiteit van Cambridge het hy ‘n lewenslange passievolle belangstelling in wiskunde en wiskundige probleemoplossing gehandhaaf. Hy is op 26 Februarie 2015 ná ‘n kort stryd teen kanker oorlede.
Die organiseerders van die kompetisie het in 2021 na die US uitgereik en ‘n kompromie gevind wat die US (en ander universiteite in ‘n tydsone weg van Australië) in staat stel om met die tweede vraestel mee te ding.
Dr. Dirk Basson, dosent en koördineerder van Wiskunde Olimpiades in die US se Departement Wiskundige Wetenskappe, het gesê vanjaar sal die universiteite in die Westerse tydsone twee vraestelle skryf, net soos die universiteite in die Oostelike afdeling, met een vraestel wat oorvleuel.
In 2021 het die ingenieurstudent Ralph McDougall ‘n derde plek in die Westerse afdeling behaal, terwyl wiskundestudente Jean du Plessis en Adri Wessels, wat as ‘n paar ingeskryf het, gesamentlik vyfde geplaas is. Hierdie gesamentlike prestasie het aan die US die derde plek besorg. Ralph sal die US op 15 Oktober 2022 by die Suid-Afrikaanse Wiskundestiging se jaarlikse prysuitdeling verteenwoordige. Die sertifikate en prysgeld sal deur mev. Corena Marais, weduwee van Simon Marias, oorhandig word.
