16 Dae van Aktivisme teen Geslagsgebaseerde Geweld (Eng. GBV) is ’n wêreldwye veldtog wat op 25 November – Internasionale Dag vir die Uitwissing van Geweld teen Vroue – begin. Dit duur tot 10 Desember, wat Internasionale Menseregtedag is.

By die Universiteit Stellenbosch (US) sluit ons ons by hierdie veldtog aan deur erkenning te gee aan die sosiale, ekonomiese, kulturele en politieke prestasies van vroue asook hulle onophoudelike toewyding aan die stryd om geslagsgelykheid, en deur dit te vier.

Die US-alumnae op wie die kollig tydens ons #EndGBV-veldtog val, kom uit alle sfere van die lewe en verteenwoordig ’n fraksie van die honderde vroue oor die wêreld heen wat aan die voorpunt veg om te verseker dat vroue en meisies veilig is en teen alle vorme van geweld beskerm word.
Daarom, Maties, moedig ons julle almal (alumni, personeel, skenkers en vriende van die US) aan om vir hierdie 16 dae betrokke te raak. Hoe kan julle dit doen? Help ons om die stemme van ons SWAN-aktiviste te laat weerklink wat vroue-organisasies ondersteun en feministiese bewegings versterk.

Begin vandag deur beeldmateriaal en boodskappe uit ons 16 Dae-veldtog verder te versprei.