As koördineerder van die Stellenbosch Vroue-alumnae Netwerk (SWAN), gee Sindiswa Jamba nie net terug aan haar alma mater nie, maar verleen sy ook ’n stem aan mede-Matie-alumnae.

SWAN is in 2020 deur die Afdeling Ontwikkeling en Alumnibetrekkinge bekend gestel. Deur mentorskapprogramme, leierskapopleiding en tafelrondes bring dit Matievroue uit verskillende omgewings en bedrywe en van oor die hele wêreld bymekaar.

“Matie-vroue vermag merkwaardige dinge op verskeie terreine in Suid-Afrika en internasionaal, so dit was belangrik om hulle te identifiseer en hulle prestasies te vier,” sê Sindiswa. “SWAN help ook om jong en voornemende studente te inspireer deur vir hulle te wys dat jy sukses kan behaal as jy jou daarop toespits.”

Sy voeg by: “Noudat ek ook ’n werknemer van die Universiteit is, het ek ’n kringloop voltooi. Dit bied my ’n volledige blik op die funksionering van die hoëronderwysruimte as ’n plek van leer en groei. My studie het my ook blootgestel aan kritiese gesprekke oor moeilike kwessies, wat my voorberei het op die uitdagings in my tipe werk. Afgesien van die meer tegniese vaardighede, het my studie my ook geleer hoe om te luister, werklik te begryp, en deernis te toon.”

Sy lig ’n paar suksesvolle SWAN-geleenthede uit sedert die inisiatief van stapel gestuur is. “Ons het gesprekke tydens Internasionale en Nasionale Vrouedag aangebied, en ook sportbyeenkomste soos die SWAN-vrouegholfdag gehou. Die gholfdag, wat oor Tuiskomsnaweek 2022 in September plaasgevind het, het alumnae van verskillende generasies in ’n sosiale omgewing byeengebring om te gesels en bande te bou. Dit was ook belangrik om te wys dat vroue wél gholf speel!”

Hulle beplan nog heelwat ander opwindende geleenthede, sê Sindiswa. “Ons beplan om ’n SWAN-leierskapboekklub bekend te stel, wat deur SWAN-lede van ons alumnitakke aangebied sal word. Ons beoog ook om ’n SWAN-adviesraad saam te stel wat as mentors vir ons vrouestudente kan dien. En dan wil ons graag in 2023 deelneem aan die Internasionale Vrouegholfdag, ’n jaarlikse wêreldwye inisiatief waar spelers met vroue en meisies kan gesels wat die sport vir die eerste keer ervaar.”

Uiteindelik wil sy graag hê dat SWAN ’n verskil sal maak in hoe vroue in die samelewing beskou word. “Ek wil graag die opvatting verander dat vroue mekaar nie ophef of ondersteun nie,” sê Sindiswa.

“Ek wil hê SWAN moet ’n netwerk- en ondersteuningsruimte wees waar vroue van verskillende terreine kan bymekaarkom en mekaar professioneel kan help groei.”