Ons Suidelike Voorstede-tak is in Mei 2022 met groot fanfare geloods en het reeds ’n opwindende aktiwiteitsprogram wat vir 2023 beplan word.

Dagboek hierdie datums

• Maart – Iets om oor na te dink Sluit by ons aan in ons gesprek met prof Kopano Ratele terwyl hy oor sy ervarings as vennoot, pa, sielkundige en navorser op die gebied van mans en manlikheid gesels. Ratele is ’n professor in sielkunde aan die US en hoof van die Stellenbosch Sentrum vir Kritiese en Kreatiewe Denke. Hy is veral bekend vir sy werk oor kwessies rakende identiteit, geweld, seksualiteit en manlikheid.
• Mei – Ons roep al ons jong alumni (diegene onder 35)! Ons beplan ’n Jong Alumninetwerkgeleentheid spesiaal vir julle.
• Oktober – Ons is seker Kaapstad is steeds jou gunstelingstad! In ’n onlangse PWC Cities of Opportunity-verslag word die toekoms van Kaapstad as ’n Afrikastad van Geleenthede ondersoek. Sluit by ons aan wanneer ons ’n Matie-spreker bekendstel wat ’n indrukwekkende en interessante lewensreis onderneem en sinoniem geraak het met die ontwikkeling van toerisme en ikoniese besienswaardighede in Kaapstad. Hierdie spreker (wat aangekondig sal word) gesels oor sy/haar verhouding met die Stad oor vele dekades heen en gee sy/haar sienings oor die toekoms.
• Saterdag 14 Oktober en Sondag 15 Oktober – Die Sanlam Kaapstadmarathon is Afrika se eerste Abbott World Marathon Majorskandidaat. Ons versoek graag spandeelname deur hierdie tak vir die insameling van fondse vir US-studente wat ons ondersteuning benodig, of jy nou ’n uithaler-atleet of net ’n sosiale drawwer is. Hierdie wedloopfeesnaweek behels die Marathon, die Vredespadwedlope van 10 km en 5 km, sowel as twee ongelooflike Tafelberg-veldwedlope van onderskeidelik 46 km en 22 km. Skryf in en sluit by ons Bridge the Gapfondsinsamelingspan aan. Kaapstad is ons tuiste. Dit is ons wedloop. Nou kan jy nie sê dat jy nie betyds genoeg gewaarsku is om te begin oefen nie!

Vir meer inligting, of indien jy betrokke wil raak, stuur ’n e-pos aan alumnihubs@sun.ac.za.