Dr Anusha Lachman, kliniese hoof van die Kinderpsigiatrie-eenheid by Tygerberg-hospitaal en senior dosent in psigiatrie by die Universiteit Stellenbosch (US) het onlangs ‘n gesaghebbende toekenning van King’s College London Erasmus+ ontvang. In 2017 het sy ook die Bongani Mayosi-beurs vir haar Afrosentriese navorsing oor geestesgesondheid in kinders ontvang.
Nadat sy die toekenning van King’s College London Erasmus+ ontvang het, het Lachman ʼn drie-maandelange uitruil-geleentheid in die Verenigde Koninkryk (VK) voltooi. Kort na haar terugkeer het ons met haar opgevang oor haar ervaring by King’s College London; die navorsing wat vir haar die Bongani Mayosi-beurs besorg het; en hoekom dit belangrik is om navorsing in kinderpsigiatrie op die Afrika-kontinent te bevorder.
Bou akademiese brûe in Londen
Die toekenning van King’s College London Erasmus+ is ʼn PhD uitruil program wat deur die Europese Erasmus-stigting befonds word. Die samewerking tussen King’s College London en die US koester akademiese verhoudinge en bevorder verdere nadoktorale samewerking tussen die twee universiteite. Volgens Lachman was hierdie ʼn uitstekende geleentheid om te netwerk, verhoudings te bou en om voorlopige gesprekke aan die gang te sit oor toekomstige navorsing by die US in die veld van geestesgesondheid van kinders en moeders.
“Dit was ʼn groot voorreg en ʼn wonderlike geleentheid om ontvang te word deur die Departement Globale Gesondheid en Sosiale Geneeskunde by King’s College London,” sê sy. “Dit was ʼn verrykende akademiese besoek wat navorsingsgesprekke ingesluit het, samewerkingsgeleentheide en netwerke gebou het met King’s College London, asook met die Kind-Adolessente Psigiatriese Navorsingseenheid by die Maudsley NHS Trust.”
Tydens haar besoek aan Londen het Lachman ook die geleentheid gehad om ʼn seminaar aan te bied by die Departement Kind- en Adolessentpsigiatrie by Oxford Universiteit wat deur professor Alan Stein aangebied is, asook ʼn aanbieding by die Gesondheidbesoekersforum vir Perinatale- en Baba-geestesgesondheid in die West Midlands.
Uitnemendheid in psigiatrie
Buiten die Erasmus-toekenning het Lachman ook die Bongani Mayosi-toekenning ontvang. Voorheen was dit die Hamilton Naki Kliniese Beurs genoem. Hierdie vooraanstaande beurs word toegeken deur die Netcare Arts-vennootskapstrust aan ʼn kliniese spesialis of subspesialis wat akademiese uitnemendheid getoon het vir doktorale of nadoktorale navorsing.
Volgens Lachman was die toekenning van hierdie beurs nie net ʼn groot prestasie vir haar persoonlik nie, maar ook ʼn pluimpie vir die veld van kinderpsigiatrie wat telkemale opsy gestoot word vir ander prominente basiese wetenskappe navorsing. “Ek is bewus van die groot verantwoordelikheid wat dit op my plaas om my PhD te voltooi, maar ook om betekenisvolle navorsingsgeleenthede in kinderpsigiatrie op die been te bring.”
Die navorsing waarmee Lachman hierdie beurs verwerf het, het op die geestesgesondheid van babas gefokus – ʼn veld wat grootliks onbetree is in Afrika. Vir haar doktorale navorsing het Lachman gekyk na die Gedeelde Plesiere Paradigma wat ʼn observasie-metode is wat die interaksie tussen moeders en babas (jonger as ses maande) bestudeer. Dit is ʼn nie-taalgebaseerde, kultureel-sensitiewe metode wat die erkenning van positiewe reaksies in babas, of ʼn tekort daaraan, moontlik maak.
Lachman se MPhil oor die geestesgesondheid van babas wat sy saam met die US se prof Astrid Berg aanbied, het ook bygedra daartoe dat sy die beurs ontvang het. Dit is die eerste graad wat gereguleerde, plaaslik sensitiewe, Afrika-intervensie gebaseerde onderrig in die geestesgesondheid van babas aanbied. “Ek het gevoel dat ons oplossings moet vind wat ons in ons omgewing kan toepas, in plaas daarvan om bloot te kyk na Westerse of Eurosentriese navorsing vir beste praktyk,” het Lachman verduidelik. Sedert die graad in 2017 van stapel gestuur is, het 11 studente dit al suksesvol voltooi.
Ontwikkel kinderpsigiatrie in Suid-Afrika
Kinderpsigiatrie is ʼn goeie veld om in te werk aangesien dit die potensiaal het om ʼn kind se ontwikkelingstrajek te beïnvloed en ʼn impak te maak op ʼn individu se geestesgesondheid waar dit die meeste saak maak, verduidelik Lachman. Nieteenstaande is die veld ernstig onderverteenwoordig en is daar minder as 45 geregistreerde kinderpsigiaters in Suid-Afrika. As ʼn klinikus-navorser hoop Lachman om by te dra tot die veld van kinderpsigiatrie in Suid-Afrika en Afrika deur vrae te beantwoord wat plaaslik relevant en kultureel belangrik is.
“Alhoewel 90% van kinders onder die ouderdom van 18 in lae- en middel-inkomste lande woon is slegs 4% van alle navorsing in die veld van hierdie lande. Ek voel dit is ons verantwoordelikheid om dit aan te spreek deur plaaslike navorsing te doen om hierdie wanbalans aan te spreek.”
Vir meer inligting oor die US se Departement Psigiatrie en Lachman se navorsing, kliek hier http://www.sun.ac.za/english/faculty/healthsciences/psychiatry .
