Professor Karin Baatjes het haar doelwit om R49 000 vir die iThemba-beursfonds in te samel oortref.
Baatjes, die Visedekaan: Leer en Onderrig aan die Universiteit Stellenbosch (US) se Fakulteit Geneeskunde en Gesondheidswetenskappe (FGGW), het mense oraloor geïnspireer om hand in die sak te steek en tot die kritiese saak van studente‑opvoeding by te dra.
“Baie dankie aan elkeen wat ’n skenking gemaak het. Deur jou hulp kan ons iThemba-beursstudente hul doelwit bereik en hul kwalifikasie behaal,” skryf Baatjes vir ondersteuners wat haar reis op sosiale media meemaak.
Al het sy haar aanvanklike teiken bereik, is die pret nog nie verby nie, want sy beplan ’n verdere drie persoonlike wedlope. Die GivenGain-bladsy is steeds oop en die skenkings word ontvang direk tot voordeel van die iThemba-beursfondsstudente in die FGGW. Volg Baatjes op Facebook vir meer inligting oor die opkomende pogings.
Inspirasie
Nadat prof Baatjes in Desember 2022 van Covid-19 herstel het, het sy vir haar die doelwit gestel om R49 000 in te samel deur 49 kilometer te hardloop vir haar 49ste verjaardag op 31 Januarie. “Een rand vir elke meter afgelê, en daarom 49 000 meter met ’n doelwit van R49 000.”
Alle skenkings gaan aan die FGGW se iThemba-beursfonds. Die fonds is agt jaar gelede gestig as finansiële hulpverlening aan studente wat nie vir befondsing kwalifiseer via die bestaande befondsingstrukture van die Universiteit, die regering en/of privaat entiteite nie.
As deel van die projek het Baatjes die bekleër van die Fakulteit Regsgeleerdheid se navorsingsleerstoel in sosiale geregtigheid aan die US, prof Thuli Madonsela, gewerf om 5 km saam met haar op die Stellenbosch-kampus af te lê.
Baatjes sê: “Opvoeding is ’n basiese mensereg, maar die wrede werklikheid is dat daar vele kwalifiserende studente is wat nie die finansiële hulpbronne het om vir hul studie te registreer en hul tersiêre opvoeding te voltooi nie. Ondersteun asseblief hierdie veldtog deur ’n skenking te maak vir elke meter wat ek aflê. Hierdeur word jy ook ’n kampvegter vir gelyke toegang tot opvoeding.”
Help prof Baatjes asseblief om haar doelwit te bereik deur hier te klik: https://www.givengain.com/ap/karin-baatjies-raising-funds-for-stellenbosch-university-south-africa/#timeline
