Die afgelope anderhalf jaar moet liefs een vir die geskiedenisboeke wees. Ons moes almal, by tye, gewis soms onoorkomelike uitdagings in die gesig staar. Hier by die Universiteit Stellenbosch (US) bly ons op ons kernmandaat gefokus — die versekering dat ons studente onderrig van ‘n wêreldgehalte ontvang, waarvoor hulle aansoek gedoen het, en om terselfdertyd ‘n volhoubare instelling te wees.
Sonder jou vrygewigheid en ondersteuning sou ons nie hierdie tydperk suksesvol kon navigeer nie. Ek het onlangs ‘n artikel geskryf wat in die Mail and Guardian gepubliseer is en wat die deurslaggewende rol illustreer wat visekanseliers as leiers van universiteite en gevolglik as hooffondsinsamelaars, van hul instellings vervul. Gun my die geleentheid om enkele van die belangrike punte wat ek in hierdie artikel aanraak, te beklemtoon wat jou, ons gewaardeerde donateur, mag interesseer.
Sedert ons Visekanselier, prof Wim de Villiers, in 2015 aangestel is, het die US R1,7 miljard in filantropiese bystand bekom. Meer as driekwart van alle skenkings is van trusts en stigtings, individue en maatskappye. Meer as ‘n derde van die R1,7 miljard wat ingesamel is, is aan beurse en studentebystand toegeken, en ‘n deel is vir onderrig, infrastruktuur, navorsing en gemeenskapsdiens aangewend. Met strategiese finansiering het ons nuwe navorsingsentrums en onderriggeboue op ons kampusse gebou en die diversiteit van ons akademiese en navorsingspersoneel verhoog.
Prof De Villiers het ons portuurfondswerwingsprojekte gelei deur aan verskeie wedlope en fietswedrenne deel te neem om geld vir voedselsekerheid op ons kampusse in te samel — ons #Move4Food-veldtog. Die Universiteit Stellenbosch is gelukkig om ‘n leier te hê wat altyd bereid is om meer as sy plig te doen om studente in nood te help. Jy kan my volledige artikel hier lees.
Terselfdertyd is daar ‘n koste aan fondsinsameling verbonde, veral wat internasionale bedrywighede betref. Maar in die geval van die US, het Inyathelo se nasionale peilingstudie, ASPIHE, aangetoon dat ons geldinsamelingsuitgawes hoogstens 11c is vir elke Rand wat ingesamel word. En die Buro vir Ekonomiese Navorsing het onlangs bevind dat ons Rektor 50 keer sy regstreekse fondsverwerwingkoste ingesamel het. Hierdie Impakverslag weerspieël die syfers.
Ek wil jou graag die versekering gee dat jou swaarverdiende fondse, wat so mildelik aan hierdie instelling geskenk word, nog altyd gebruik word soos jy dit bestem het – en sal steeds op hierdie manier aangewend word. Jou vrygewigheid help inderdaad om ‘n blink toekoms te skep. En ons kan nie genoeg dankie sê nie.
Enige navrae of vrae? Ek staan reg vir jou telefoonoproep of e-pos.
Met dankbaarheid
Karen Bruns
Senior Direkteur: Ontwikkeling en Alumnibetrekkinge
Universiteit Stellenbosch
