Die lot van studente wat sukkel om hul universiteitsgeld te betaal, is een van die dringendste uitdagings vir tersiêre onderwys in Suid-Afrika in 2024. Om hierdie kwessie aan te pak verskerp die Universiteit Stellenbosch (US) pogings om ʼn einde aan studente se skuld te maak.
Die eerste fondsinsamelingsaktiwiteit van die jaar sal op 3 Februarie 2024 deur die Sentrum vir Sosiale Geregtigheid (CSJ) deur hul #Action4Inclusion Social Justice Walk aangebied word. Oor die afgelope vyf jaar het dié staptog ʼn belangrike brugbou-inisiatief geword wat diverse belanghebbendes byeenbring. Prof Thuli Madonsela, Direkteur van die CSJ, sal saam met lede van die US se Studenteraad ʼn vroegoggendstap van 12 km in die pragtige Banhoek-bewarea in Kylemore naby Stellenbosch onderneem.
‘Vermiste middel’-studente
Alle opbrengste van die staptog sal gebruik word om akademiese insluiting en die afbetaling van historiese skuld van verdienstelike studente te verseker.
#Action4Inclusion is belyn met die US se Visekanselier se #BridgeTheGap-inisiatief, wat ten doel het om die gaping rakende tersiêre akademiese finansiële ondersteuning te oorbrug, veral om die sogenaamde “vermiste middel”-studente te teiken met die doel om te verseker dat geen verdienstelike student agtergelaat word nie.
Een van die studente wat onlangs regstreeks by #Action4Inclusion se ondersteuning gebaat het, is Zwelethu Mtumtum, wat ʼn gevorderde diploma in openbare verantwoordbaarheid aan die US voltooi het. “Ek het in 2021 gesinsuitdagings ervaar en het akademies gesukkel, maar #Action4Inclusion het ʼn reddingsboei geword,” verduidelik Mtumtum. “Die finansiële bystand het my registrasie vir die 2022- akademiese jaar vergemaklik, wat my in staat gestel het om te gradueer en #Action4Inclusion het my uitstaande skuld in 2023 gedelg, wat my in staat gestel het om my kwalifikasie te verwerf.” Mtumtum is dankbaar vir die ondersteuning en het nou ʼn BA Honneurs in openbare administrasie aan die US in die visier.
Die Sosiale Geregtigheid-staptog op 3 Februarie sal ook dien as aktivering van Madonsela se Pelgrimstog van Hoop-staptog van Franschhoek na Kaap Agulhas, ʼn afstand van 300 km. Die Pelgrimstog van Hoop simboliseer die moeilike pad wat sommige studente in hul strewe na onderrig stap. Madonsela het die eerste twee fases van die roete van Stellenbosch na Franschhoek in Augustus 2023 voltooi.
Gelyke speelveld
Madonsela sê die komende Sosiale Geregtigheid-staptog is ʼn geleentheid om vir die Pelgrimstog van Hoop te oefen, terwyl deelnemers ook idees oor die uitdagings van studenteskuld sal kan uitruil voor die akademiese jaar begin. “Studente moet stabiele lewens hê om op ʼn gelyke speelveld met hul eweknieë mee te ding. Die ondersteuning van deelnemers beteken die wêreld vir die studente wat geraak word en vir die klein span wat die projek gedryf het. Met julle ondersteuning en innoverende idees glo ons 2024 sal ʼn deurbraakjaar wees,” sê Madonsela.
Die US se Maties Connect, ʼn fondsinsamelingsinisiatief onder leiding van studente, ondersteun ook die Sosiale Geregtigheid-staptog. Die grootste geleentheid wat deur Maties Connect gereël word, Vensters, is ʼn jaarlikse opelugteaterskouspel vir nuwelinge aan die US. Vensters 2024 sal ʼn gesinsvriendelike skouspel wees wat op 14 Februarie by die Coetzenburg-stadion aangebied sal word. Die tema is “A Whole New World”.
Onthou die Datum
Alle deelnemers aan die Sosiale Geregtigheid-staptog moet om 07:00 op 3 Februarie by Bethlehem-plaas in Rooistraat 1, Kylemore ontmoet. Die begeleide staptog sal om 07:30 begin en behoort teen 11:00 voltooi te wees. Stappers kan uitsien na ʼn matige tot moeilike stap in ʼn wonderlike omgewing. Dra ʼn hoed en pak jou eie water en eetgoed in. Meer besonderhede en logistieke reëlings sal gekommunikeer word aan deelnemers wat kaartjies gekoop het.
- Kaartjies kos R500 per persoon en kan aanlyn by Quicket gekoop word: https://qkt.io/Thuli3Feb
- Vir registrasie en verdere inligting, kontak asseblief vir Thembalethu Seyisi by tseyisi@sun.ac.za of +27 72 785 3218.
