Haar eie ervarings en ’n begeerte om werksomgewings deur intellektuele aktivisme te verbeter, het prof Anita Bosch se paadjie gevorm. Anita van die Stellenbosch Bestuurskool beklee ʼn navorsingsleerstoel gewy aan die studie van vroue en werk.
Voordat sy by die US aangesluit het, was sy die hoofsameroeper van die navorsingsprogram “Women in the Workplace” by die Universiteit van Johannesburg, waar sy onderrig gegee het en ook ’n aantal leiersrolle beklee het. Voor haar universiteitsloopbaan het sy gewerk en leiersposisies beklee in die velde van rekeningkunde, menslikehulpbronontwikkeling en betaalstelsels in die private sektor.
Sy is die skrywer en redakteur van ’n aantal openbare verslae, insluitend die Womensreport.africa, Women on South African boards: Facts, fiction and forward thinking; Gender pay gap guide for the already converted; and Winds of change: Trade as a catalyst for board gender diversity.
Voordat sy haar akademiese loopbaan begin het en ná etlike jaar in die korporatiewe wêreld, het Anita en haar lewensmaat besluit om met ’n gesin te begin. Dit is toe sy besef het dat sy ander keuses as haar manlike eweknieë moet maak.
“Ek was nie ongelukkig daaroor nie, ek was net gefrustreerd dat ek nie meer kon deelneem in die werksomgewing soos ek graag sou wou nie,” onthou sy.
As ’n kind is Anita aangemoedig om te glo dat sy kon wees wat ook al sy wou wees, en sy was nie gewillig om die status quo blootweg te aanvaar nie.
“Ek het afrigtingsgeleenthede gesoek om my te help om sin te maak van dit alles en het toe opleiding ondergaan sodat ek as ʼn afrigter vir ander kon optree. Dit voel asof die veld van vroue en werk na my toe gekom het as gevolg van my lewenservaringe. Dit was maar net deel van die paadjie wat ek geloop het en wie ek is.”
Sy het besef sy kon navorsing doen deur die lens van vroue en betekenisvolle bydraes maak om werksomgewings vir vroue én mans te verbeter.
Anita glo geleenthede soos Internasionale Vrouedag is belangrik om aandag te gee aan die onderstrominge in dialoë oor vroue en hul rol in regerings, besigheid, die samelewing en huishoudings.
“Elke keer as ek wonder of dit werklik nodig is om Vrouedag te vier, herinner ek myself daaraan dat die generasie wat voor my gekom het, ongelooflik baie werk gedoen het om die pad vir my generasie gelyk te maak, en dat ek en my generasie steeds ’n groot rol het om te speel om dit makliker vir my dogter en seun se generasie te maak.”
Volgens Anita lyk dit of daar ’n aanname bestaan dat daar ʼn leierskapprototipe is, en as jy nie by daardie begrip inpas nie – en die meeste vroue pas nie daarby in nie – word jy nie as ʼn goeie leier beskou nie.
Die tema vir Internasionale Vrouedag 2023 is #EmbraceEquity en sy sal in haar praatjie op 8 Maart verwys na die verskil tussen gelykheid (equality), wat op diversiteit fokus, en regverdigheid (equity), wat op insluiting fokus.
Sy voer aan dat as stelsels en praktyke nie verander om insluiting te bevorder nie, sal vroue – veral dié wat op rade dien of leierskapposisies beklee – aanhou om maatskappye te verlaat, wat die stereotipe versterk dat vroue nie die mas kan opkom nie.
“Jong vroue moet besef hulle betree ’n omgewing wat nie noodwendig vir vroue gebou is nie, maar dat hulle kan help deur insluiting te kweek. Hulle hoef nie slagoffers of slawe van die stelsel te wees nie,” sluit sy af.
- Anita is deel van ‘n paneel van merkwaardige Matie-vroue wat op 8 Maart die onderwerp, “The Gender Gap: Creating Transparency for Women to Thrive”, sal bespreek.
- Ter herdenking van Internasionale Vrouedag wat op 8 Maart dwarsdeur die wêreld gevier word, werp die Stellenbosch Vroue-alumnae Netwerk (SWAN) die soeklig op ons merkwaardige vroue, nie net vir ’n dag nie, maar vir die hele Maartmaand.
- Lees meer hier: https://console.vpaper.ca/stellenbosch-university/swan-iwd23_afr/
