Die Universiteit Stellenbosch se jaarlikse Tuiskoms-en-Familienaweek vir alumni vind van 5 tot 9 Maart 2020 op ons skilderagtige Stellenboschkampus plaas – en as jy nie daar kan wees nie, kom kuier dan gerus hier by ons in Londen.
Kuier saam tydens ons Tuiskomsviering by Hammer & Tongs in Farringdon, wanneer ons die “langtafel” van Ryneveldstraat in die vorm van ons eie “mini-langtafel” gaan herskep.
Tuiskoms is ’n geleentheid om met mede-Maties te netwerk wat in Londen en die Verenigde Koninkryk woon en werk. Bou nuwe vriendskaps‑ en sakenetwerke en versterk die bestaande.
Kaartjies kos slegs £30 en sluit in ’n driegang-braaibord wat gedeel kan word, ’n glasie Suid-Afrikaanse vonkelwyn by jou aankoms en ’n optrede deur die Suid-Afrikaanse musiekgroep die Stone Jets.
Tien pond van jou kaartjieprys word geskenk aan die Universiteit Stellenbosch se #Move4Food‑veldtog, ’n inisiatief wat deur studente gevestig is om die impak van honger te verlig op daardie studente wie se finansies nie al hul uitgawes dek nie.
Kom geniet ’n heerlike aand tussen mede‑Maties, kuier gesellig saam en maak ’n verskil in die lewe van nuwe Maties aan jou alma mater.
Onthou, die plek is beperk – daar is slegs 50 kaartjies vir die geleentheid beskikbaar. Bespreek dus gou en voorkom teleurstelling.
Datum: Donderdag 5 Maart 2020
Tyd: 18:30 tot laat
Venue: Hammer & Tongs, Farringdon-weg 171, Farringdon, Londen EC1R 3AL (Aanwysings)
Kleredrag: Netjies informeel
- Rig asseblief ʼn e‑pos aan darrynh@sun.ac.za om jou bespreking te maak. ’n Kontantkroeg is vir die volle duur van die aand beskikbaar.
Ons Matie-familie is oor die hele wêreld versprei en ons wil graag met soveel van julle as moontlik kontak maak. Stuur gerus hierdie uitnodiging aan mede‑Maties en moedig hulle aan om hul jongste kontakinligting aan alumni@sun.ac.za te stuur.
Moenie vergeet om by ons Maties Connect‑alumni‑platform aan te sluit om op die hoogte van ons alumni-geleenthede en -aktiwiteite te bly nie.
