Die Afrika‑akademie vir wetenskappe (AAS) het ’n vennootskap met die VS se nasionale gesondheidsinstitute (NIH) en die Bill & Melinda Gates‑stigting aangegaan ter verstewiging van wetenskaplike leierskap in Afrika en die bevordering van gesondheids‑ en ontwikkelingsdoelwitte op die vasteland.
Die Universiteit Stellenbosch se dr Carine Kunsevi Kilola is een van tien uitmuntende vroeëloopbaan‑wetenskaplikes uit nege Afrika‑lande aan wie genootskappe van vier jaar toegeken is met die doel om kapasiteit te bou vir die uitvoer van voorpuntnavorsing in wêreldwye gesondheid. Die genootskappe word toegeken via die African Postdoctoral Training Initiative‑ (APTI‑)program, welke program deur die Afrika‑akademie vir wetenskappe (AAS) in vennootskap met die VS se nasionale gesondheidsinstitute (NIH) en die Bill & Melinda Gates‑stigting geïmplementeer word.
Die APTI‑program is in 2019 van stapel gestuur om navorsingskapasiteit in Afrika‑lande te verstewig en deurlopende wetenskaplike vennootskappe te ontwikkel. Die APTI‑genote word opgelei en ondersteun om wetenskaplike leiers te word wat voorstaanders van uitgebreide navorsings‑ en innovasieprojekte in Afrika kan word. Dit word gedoen via vierjaar- nadoktorale genootskappe waartydens APTI-genote twee jaar lank by verskeie laboratoria van die NIH se institute of sentra aansluit voor hulle terugkeer na hul tuisinstellings in Afrika vir ’n verdere twee jaar se programondersteuning. Die Bill & Melinda Gates-stigting se steun aan die nadoktorale genote sluit in saadbefondsing vir hul navorsing by hulle terugkeer na die tuisinstelling.
Dr Peggy Oti-Boateng, Uitvoerende Direkteur by die Afrika‑akademie vir wetenskappe (AAS), sê “Die belegging in vroeëloopbaan‑wetenskaplikes is ’n noodsaaklike bestanddeel vir die transformasie van Afrika op ‘n kennisgebaseerde en tegnologie-geleide vasteland. Die AAS is daartoe verbind om navorsings‑ en innovasie‑uitruilings te fasiliteer ten einde navorsingsleierskap in Afrika te verbeter, lewens op die vasteland te transformeer, en die ‘Afrika wat ons wil hê’ te lewer.”
Hierdie derde kohort van die APTI‑genote (APTI 3), wat uit vyf vroue en vyf mans bestaan, aanvaar hul posisies in die NIH se gasheerlaboratoria in Oktober 2023. Die genote se navorsingsaktiwiteite is toegespits op spesifieke wêreldwye prioriteiteareas vir gesondheidsnavorsing, ingesluit menslike immunobiologie, mikrobioomnavorsing, die ontdekking van geneesmiddels, genomika, MIV, malaria, en moeder-, neonatale en kindergesondheid.
“Hierdie gesamentlike poging bring uitmuntende Afrika‑navorsers in die vroeë loopbaan na die NIH en verstewig ons navorsingsvennootskappe en ‑kapasiteit in Afrika oor die lang termyn,” sê dr Peter Kilmarx, waarnemende direkteur van die Fogarty internasionale sentrum en waarnemende mededirekteur vir internasionale navorsing aan die NIH, “Ons is verheug om hierdie tien nuwe uitstaande wetenskaplikes met uiteenlopende navorsingsbelangstellings te verwelkom.
Die APTI 3-genote verteenwoordig die beste navorsingstalent op die vasteland en het meegeding om ’n plek uit 296 aansoekers. Die tien nuwe genote sluit aan by twee ander aktiewe kohorte wie se besonderhede op die APTI‑program se webtuiste beskikbaar is.
Kohort 3: Genote vir die African Postdoctoral Training Initiative (APTI) 2023
- Genoot: Carine Kunsevi Kilola
Tuisinstelling: Universiteit Stellenbosch
Land: Suid‑Afrika
Navorsingsgebied: Moeder‑ en kindgesondheid - Genoot: Alphonsus Ugwu
Tuisinstelling: Redeemer’s University
Land: Nigerië
Navorsingsgebied: Menslike immunobiologie vir waarneming - Genoot: Amadou Niangaly
Tuisinstelling: University of Sciences, Techniques and Technology of Bamako
Land: Mali
Navorsingsgebied: Malaria‑ monoklonale teenliggaampies - Genoot: Daniel Amoako-Sakyi
Tuisinstelling: University of Cape Coast
Land: Ghana
Navorsingsgebied: Mikrobioom‑ en immuunreaksies in kinders - Genoot: Diana Marangu
Tuisinstelling: University of Nairobi
Land: Kenia
Navorsingsgebied: Respiratoriese gesondheid in kinders - Genoot: Kaelo Seatla
Tuisinstelling: Botswana Harvard AIDS Institute Partnership
Land: Botswana
Navorsingsgebied: MIV‑genomika - Genoot: Lobe Maloba
Tuisinstelling: University of Buea
Land: Kameroen
Navorsingsgebied: Ontdekking van geneesmiddels - Genoot: Rita Boateng
Tuisinstelling: Noguchi Memorial Institute for Medical Research
Land: Ghana
Navorsingsgebied: Malaria‑ molekulêre waarneming / teenmalaria‑weerstandigheid - Genoot: Vinie Kouamou
Tuisinstelling: Charles River Medical Group
Land: Zimbabwe
Navorsingsgebied: MIV‑inentingsontwikkeling / ‑geneesmiddel - Genoot: Yaovi Hounmanou
Tuisinstelling: University of Abomey-Calavi
Land: Benin
Navorsingsgebied: Genomika vir waarneming
Onderskrif: Dr Carine Kunsevi Kilola
