Roseline Kolony beskik reeds oor die graad BCom (Bestuurswetenskappe) en werk tans aan haar honneursgraad in Finansies. Sy glo sy sou waardevolle leergeleenthede misgeloop het as sy nie deel was van die Universiteit Stellenbosch (US) se Verlengde Graadprogram (VGP) nie.
Die US se VGP voeg ‘n bykomende studiejaar by ‘n hoofstroomgraadprogram by. Dié jaar word gebruik om studente deur middel van bykomende akademiese steun vir spesifieke hoofstroomvakke sowel as universiteitstudie in die algemeen voor te berei.
Ontsluit ‘n wêreld van kennis
Roseline is in die Demokratiese Republiek die Kongo gebore. Sy het 17 jaar gelede na Suid-Afrika verhuis en haar hele skoolloopbaan in Bellville-Suid voltooi. Om deel te wees van die VGP het haar in staat gestel om uit te kom by “wat ek eintlik wou studeer”, al het sy heimlik getwyfel of sy dit sou kon baasraak, sê sy. Hoewel sy ‘n idee gehad het dat sy Bestuurswetenskappe wou studeer, was sy hoegenaamd nie seker wat dít behels nie. “Ek het eers in my eerste jaar met konsepte soos belegging en handel kennis gemaak. Voorheen het ek niks daarvan geweet nie. Ek het dit alles in my eerste jaar ontdek,” sê sy. “Ek het my hoofvakke in my tweede studiejaar begin kies, so daardie eerste jaar was besonder voordelig.”
Noudat sy aan die Universiteit van Kaapstad aan haar honneurs werk, glo sy vas dat die VGP tot haar sukses bygedra het. “Baie universiteite bied nie ‘n verlengde leerprogram aan nie, so ek het baie bevoorreg gevoel om hierdie geleentheid by die US te kon hê,” sê sy. “Ek het al ‘n hele klomp studente ontmoet wat van ander provinsies af kom om die VGP by Stellenbosch te volg, want dit is een van die min plekke wat hierdie unieke geleentheid bied.”
Ekstra jaar maak enorme verskil
Roseline sê die bykomende jaar van die program het ‘n reuseverskil in haar persoonlike ontwikkeling gemaak. “Dit was ‘n wonderlike geleentheid om te wys wat ek kan doen. Daarom sê ek gereeld vir studente om nie mismoedig te voel oor die ekstra jaar nie. Dit is inderwaarheid ‘n fantastiese oorbruggingskursus tussen hoërskool en universiteit, en berei jou voor vir jou eintlike eerste jaar.”
VGP-studente volg ‘n paar modules eie aan die verlengde program, en ‘n paar modules uit die eerste jaar van die hoofstroomprogram, waarna die res van die eerstejaarkursusse in hulle tweede studiejaar volg. Een VGP-spesifieke kursus is Akademiese Geletterdheid, en dit is veral die lesse uit hierdie module wat Roseline steeds toepas. “Dit was ‘n verpligte module wat ons verskeie vaardighede geleer het, waaronder akademiese skryfvaardighede,” verduidelik sy. “Dit het my geleer wat akademiese literatuur nou eintlik is, en hoe om portuurbeoordeelde bronne in my skryfwerk te gebruik. Ek gebruik nog gereeld daardie kennis.”
‘n Verdere bonus van die VGP was die hegte vriendskappe wat sy kon vorm, sê Roseline. “Ek is ‘n introvert en skram gewoonlik weg van mense. Maar omdat ons klas uit minder as 30 mense bestaan het, kon ek byna almal leer ken en goeie vriende maak,” sê sy. “Ek het lewenslange vriende gemaak, en ons almal het mekaar gedurende ons studie ondersteun.”
Streef na eie firma
Roseline beoog om ‘n geoktrooieerde finansiële ontleder (CFA) te word, en hoop om op lang termyn haar eie batebestuursfirma op die been te bring. “Ek wil my firma posisioneer om mense soos ek te help wat uit minderbevoorregte omstandighede kom en nooit die nodige blootstelling aan finansiële konsepte gehad het nie. Ek sou graag wou help om hulle finansiële loopbane aan die gang te sit,” sê sy.
