As ‘n bekroonde voedselwetenskaplike het Sinesipho Galada haar ware passie gevind. En dit is alles te danke aan die Universiteit Stellenbosch se SciMathUS-program, wat haar aan die wonders van voedselwetenskap bekend gestel het.
Galada se passie het daartoe gelei dat sy met die voedselwetenskap- en tegnologie-prys in 2021 saam met ‘n groep medestudente by die Institute of Packaging South Africa se jaarlikse Gold Pack-toekennings bekroon is.
Maar voor haar sukses was sy ‘n graad 12-student wat net graag ‘n tweede kans wou hê om toelating tot hoër onderwys te verkry. Die SciMathUS-program gee hoërskoolleerders wat reeds graad 12 geslaag het, maar nie vir hoëronderwyskeuring kwalifiseer nie, ‘n tweede kans om hul Nasionale Senior Sertifikasie (NSS) resultate in wiskunde, fisiese wetenskappe en rekeningkunde te verbeter. Dit stel hulle dan in staat om weer vir universiteitsprogramme aansoek te doen.
Galada sê: “Nadat ek my graad 12-punte ontvang het, was die meeste van my aansoeke vir hoëronderwys van die hand gewys. Ek is wel by een instelling aanvaar, maar ongelukkig het ek nie destyds befondsing gehad nie. Terwyl ek nog op soek was na befondsingsgeleenthede, het ek van die SciMathUS-program gehoor en gedink dat dit iets is wat my kan bevoordeel. My fisiese wetenskappe-punte was nie goed genoeg nie en ek wou dit verbeter, want ek dink dit was die rede waarom ek nie aanvaar is by die instellings waar ek aansoek gedoen het nie.”
Sy het daarin geslaag om aanvaar te word in die SciMathUS-klas van 2017.
“Die SciMathUS-program het my nie net gehelp om my NSS-punte te verbeter nie, maar dit het my ook aan my loopbaankeuse bekend gestel het. Voor SciMathUS het ek niks van voedselwetenskap geweet nie. Nadat ek daarvan gehoor het, was ek vasbeslote om dié studierigting te volg.”
Sy het voortgegaan om vir ‘n BSc (Voedselwetenskap)-graad aan die US te studeer en het dit in 2021 voltooi.
“Ek het hierdie graad gekies omdat ek voel dat dit my verteenwoordig. Van kleins af al het voedselhigiëne- en veiligheid my nog altyd gefassineer. Ek het myself in dié graad gesien.”
Haar passie vir haar gekose loopbaan het ook daartoe gelei dat sy in 2021 die IPSA se Food Science and Technology-prys saam met ‘n groep medestudente ontvang het.
Galada, wat afkomstig is van die klein Oos-Kaapse dorp Molteno, het bygevoeg dat die SciMathUS-program haar ook gehelp het om uit haar gemaksone te ontsnap.
“My hele lewe lank al was ek nog altyd net saam met my eie mense van die amaXhosa-stam. Die program het my geleer om met ander te kommunikeer en ek het ‘n diverse groep mense leer ken. Ek het ook ander tale buiten my moedertaal en Engels geleer. Ek glo dat die oorgang van hoërskool na universiteit vir my moeilik sou gewees het as dit nie vir hierdie program was nie. Dit het dit makliker vir my gemaak om my universiteitsloopbaan te trotseer.”
Sy studeer tans vir ‘n MSc (Voedselwetenskap), met ‘n fokus op voedselmikrobiologie, aan die Universiteit van Pretoria.
“Ek daag altyd myself uit om beter te doen,” sê sy. “Ek kom uit ‘n benadeelde agtergrond en ek wil dit verander en ‘n nuwe weg baan vir die generasie na my.”
