Die Sentrum vir Aansoeke, Studentehuisvesting en Kliëntedienste (ASACS) in die Registrateursafdeling lewer noodsaaklike studentedienste om te sorg dat die Universiteit Stellenbosch (US) ‘n uitnemende residensiële hoëronderwysinstelling bly. Dr Celeste Nel staan aan die stuur van ASACS en is in haar element hier waar sy saam met haar span hulle weg deur die dinamiese hoëronderwysomgewing baan.
As deel van die US se Vrouemaandvieringe, vertel Celeste ons meer van haar werk en die leierseienskappe wat dit vereis.
Vertel ons meer van jou rol by die Universiteit Stellenbosch
Ek werk in ASACS, wat aan die voorpunt staan van studentedienste by die Universiteit. Dit is ‘n snelbewegende omgewing waar ons meer as 70 000 aansoeke nagaan, 8 000 koshuisbeddens bestuur, 5 000 privaat beddens akkrediteer, en daagliks tot 1 000 navrae van ons kliënte (voornemende studente, ingeskrewe studente en alumni) hanteer.
Ek is bevoorreg om aan die hoof te staan van hierdie dinamiese sentrum, met my vaardige bestuurspan en personeel aan my sy.
Wat geniet jy die meeste van jou rol?
Ek geniet my span se energie die meeste. Byna 80% van die span is millenniërs of Generasie Z. Hulle hou my behoorlik op my tone. Hulle vra kritiese vrae, toets grense, en is nie bang om kanse te waag nie. Ek leer elke dag baie by hulle.
Ek geniet ook die hoëronderwysomgewing, wat ‘n immer veranderende landskap is. Die uitdagings en konstante verandering hou my gestimuleer en betrokke.
Boonop geniet ek dit om deel te wees van ‘n groter doel.
Wat is volgens jou die belangrikste leierseienskappe wat jou werk vereis?
Om te luister met die doel om te verstaan, en om aanpasbaar, doelbewus en doelgerig te wees. ‘n Mens moet oplossinggedrewe en ondersteunend wees, en nooit ophou leer nie.
Leiersrolle is veeleisend. Wat hou jou gemotiveerd?
My span motiveer my. Om deel te wees van die onderwys gee my ook energie. Nelson Mandela se bekende woorde inspireer my steeds: “Onderwys is die kragtigste wapen wat jy kan gebruik om die wêreld te verander.”
Wat is jou boodskap aan die volgende generasie aspirantvroueleiers?
- Moenie vashaak by die tradisionele rolverwagtinge van vroue nie. Skep jou eie.
- Dit ís moontlik om alles te hê. Jy kan ‘n gesin, hope vriende, ‘n stokperdjie, selfs ‘n troeteldier én ‘n florerende loopbaan hê.
- Probeer getrou bly aan jouself. Dis nie altyd maklik nie, maar dit sal jou op alle vlakke van jou lewe vervul.
- Moet nooit ophou leer en groei nie.
- Wees gaaf met ander en jouself.
Fotograaf: Stefan Els
