As die Stad Kaapstad se jongste verkose wyksraadslid tot nog toe, kan Lwazi Phakade nou sy passie vir politieke en sosiale aktivisme wat in sy jeug vlamgevat het en verder aan die Universiteit Stellenbosch gevorm is aktief najaag.
Die 27-jarige is ná ’n “strawwe en veeleisende verkiesingsproses” in die plaaslike regeringsverkiesing in November 2021 tot wyksraadslid vir Langa verkies.
Hy sê sy besluit om terug te keer na die gemeenskap waar hy grootgeword het en waar die grondslag vir sy aktivisme gelê is, was nie ’n moeilike een nie. “Ek het in die ou trekarbeidershostelle in Langa grootgeword, en die erge ongelykheid en onvoldoende dienste waarmee inwoners daagliks te doen gehad het, het my altyd geskok.”
Lwazi het ook ’n groot deel van sy kinderjare op die Oos-Kaapse dorp Gcuwa, ’n plek met “weinig indien enige dienslewering”, deurgebring. “My persoonlike belewenis van daardie realiteite het my aktivisme die eerste keer laat vlamvat,” sê hy.
Maar dit was aan die US, waar hy in 2019 die graad BA in Sosiale Dinamika verwerf het, waar sy politieke en maatskaplike aktivisme grootliks gevorm is. “Om Politieke Wetenskap en Geskiedenis as my hoofvakke te hê het my ’n dieper begrip gegee van sommige van die uitdagings waarvoor ons land te staan kom, waaronder armoede, werkloosheid en misdaad. My studies het ook my horisonne verbreed na ’n wêreld wat hemelsbreed verskil van waar ek vandaan kom,” verduidelik hy. “Ek het begin verstaan hoe ander samelewings in die wêreld hulle uitdagings hanteer.”
Hy voeg by: “Ek het ook my tyd op Stellenbosch daaraan gewy om kampvegter te wees vir die stryd van studente op kampus. Ek was deel van die studenteliggaam wat die belangegroep Open Stellenbosch gestig het om transformasie by die Universiteit te help bevorder. Ek is in 2015 in die Studenteraad verkies, en ek het Wes-Kaapse student as ’n provinsiale sameroeper van die Suid-Afrikaanse Studentekongres verteenwoordig. Boonop was ek aan die voorpunt van die #FeesMustFall-veldtog.”
Hy benadruk ook die rol wat sy familie – sy oorlede ouma, oupa en ma, asook sy tannie – gespeel het om hom vir aktivisme voor te berei.
“My familie het my lewe rigting gegee omdat hulle my geleer het om nederig te wees en te veg vir waarin jy glo. Ek is hulle ewig dankbaar,” sê hy.
Vir die jong politikus is sy werk as wyksraadslid vervullend en bevredigend omdat hy mense se lewens direk kan verbeter deur “na onmiddellike oplossings vir komplekse probleme te soek”. Lwazi twyfel nie oor sy doelwitte nie: “Ek wil in my ampstermyn dienslewering in my gemeenskap verbeter. Dít sluit in basiese toegang tot water, elektrisiteit, riolering en behuising. Ek streef daarna om verandering te bring in die daaglikse omstandighede van arm Suid-Afrikaners wat in informele huise en in klein dorpies woon.”
Hy is ook ’n groot voorstander van die krag van onderwys om die wêreld ten goede te verander, en sê: “Ek wil graag met hoërskole saamwerk om seker te maak dat meer leerders vir studie aan universiteite of tegniese kolleges aanvaar word.”
In sy vrye tyd koester Lwazi elke oomblik wat hy saam met sy gesin en sy sesjarige seun kan deurbring. Hy geniet dit ook om sosiopolitieke besprekings by te woon, skaats graag, en is versot op jazz, poësie en kuns.
- Skrywer: Daniel Bugan
- Hierdie is die eerste uitgawe van ons tydskrif vir Matie-alumni, en dit weerspieël die stories van vele mense met unieke geeskrag.
Is jy op soek na ’n paar oplossings vir die lewe, of het jy eenvoudig nodig om weer te hoor hoe teëspoed in geleenthede omskep kan word? Lees dan gerus verder, Matie!
https://console.vpaper.ca/stellenbosch-university/always-a-matie-202301_afri/
