Op Vrydag 26 Mei het Samantha Cox en Greta Frieslaar – twee van ons Chinese Honneursstudente by die Departement Moderne Vreemde Tale (MFL) – aan die 22ste jaarlikse “Chinese Bridge” Chinese Vaardigheidskompetisie vir Kollegestudente deelgeneem. Die kompetisie is persoonlik by die Durban Universiteit van Tegnologie aangebied, vir die eerste keer sedert die begin van die pandemie.
Dit het uit drie rondtes bestaan. Eers ‘n Chinese taal-, kultuur- en geografievasvra, dan ‘n toespraak oor die onderwerp “Een wêreld, een gesin” en uiteindelik ‘n talentvertoning.
Na maande se voorbereiding het Samantha en Greta saam met nog ‘n student van die Universiteit van die Witwatersrand hul weg gedans na die gesamentlike tweede plek. Die kompetisie was hoogs mededingend, met slegs ‘n paar desimale punte tussen die top-aanspraakmakers. Van die tweede plek-wenners is Samantha gekies om later vanjaar aan ‘n twee weke lange Somerkamp in China deel te neem.
Aan die einde van die dag het albei studente die kompetisie verlaat met nie net ‘n silwer medalje nie, maar met nuwe ervarings, nuwe vriende en nuwe vaardighede!
Chinese Bridge (Hanyuqiao) is ‘n kompetisie vir buitelandse studente oor hul bemeestering van die Chinese taal, bevorder deur die Sentrum vir Taalonderrig en Samewerking. Studente van die Chinese afdeling van MFL het in die verlede die eerste plek in verskeie kompetisies verower en het Suid-Afrika in die eindronde in China verteenwoordig.
