Die Universiteit Stellenbosch (US) se prof Thuli Madonsela het gisteraand (15 Augustus 2023) nog ‘n pluimpie ontvang toe sy die jaarlikse toekenning vir lewenslange prestasie van die Suid-Afrikaanse Vereniging vir Onderwysreg (SAVO) in ontvangs geneem het. Die toekenning word aan individue toegeken wat ‘n groot bydrae op die gebied van die opvoedkunde en reg gelewer het en wat buitengewone toewyding en harde werk regdeur hulle loopbane getoon het.
Madonsela, die direkteur van die Sentrum vir Sosiale Geregtigheid (CSJ) by die US, het hierdie erkenning as ‘n eer en voorreg beskryf. “Ek was veral verheug om hierdie toekenning te ontvang, want dit is ‘n mosie van vertroue van my eweknieë in die werk wat ons by die CSJ doen. Dit is hartsverblydend dat ons eweknieë in die opvoedkundige en regsberoep waardering vir ons innoverende inisiatiewe oor sosiale geregtigheid, soos #Action4Inclusion, het. Hierdie toekenning sal ‘n spesiale plek in my versameling inneem langs die Prokureursorde en Statebond Regsvereniging se Waarheid- en Geregtigheidstoekennings en die Sydney en Felicia Kentridge-toekenning van die Algemene Balieraad van Suid-Afrika.”
SAVO het erkenning gegee aan Madonsela se uitgebreide ondervinding as ‘n regsprofessor en haar gerekende posisie as die bekleër van die Regstrust-leerstoel in Sosiale Geregtigheid aan die US. Die president van SAVO, prof Mariëtte Reyneke, sê in ‘n verklaring namens SAVO dat Madonsela se onlangse aanstelling in die Verenigde Nasies se Wetenskaplike Advies Raad vir Onafhanklike Advies oor Deurbrake in Wetenskap en Tegnologie is ‘n bewys van haar bydrae op die gebied van die opvoedkunde en navorsing.
“Prof Madonsela se werk in toegepaste konstitusionele en administratiewe reg, veral in die ondersoek na onbehoorlike optrede in staatsake, was van uiterste belang om landburgers se regte te beskerm en goeie staatsbestuur te bevorder,” sê Reyneke.
SAVO het ook erkenning gegee aan Madonsela se rol as die stigter van die Thuma-stigting vir Demokratiese Leierskap en Geletterdheid, wat ‘n groot rol speel om leierskapsvaardighede te kweek en geletterdheid onder die jeug te bevorder.
Haar vorige pos as die Openbare Beskermer van Suid-Afrika en haar betrokkenheid by die opstel van die Suid-Afrikaanse Grondwet en verskeie wette wat deur Grond voorgeskryf is, soos die Wet op die Bevordering van Gelykheid en Voorkoming van Onbillike Diskriminasie, die Wet op Gelyke Indiensneming en die Wet op die Bevordering van Administratiewe Geregtigheid, beklemtoon volgens Reyneke haar onwrikbare toewyding tot die handhawing van die beginsels van geregtigheid, gelykwaardigheid en regverdigheid. “Haar nalatenskap sal beslis voortgaan om komende geslagte regspraktisyns en voorstanders van sosiale geregtigheid te inspireer.”
