David-John Michael Steyn, ʼn trotse Universiteit Stellenbosch- (US-)alumnus, deel sy reis: van sy uitdagings om sy droomloopbaan na te jaag tot Finansiële Bestuurder by een van Suid-Afrika se grootste regsfirmas. Steyn is ʼn gegradueerde van die SciMathUS-program, ‘n universiteitsvoorbereidingsprogram aangebied deur US vir studente wat nie aan die minimumvereistes vir toelating tot ʼn spesifieke kursus voldoen het nie.
Steyn se droom was om rekeningkunde te studeer, maar na sy matriek eindeksamen het hy nie die vereiste punt vir wiskunde gehad om aanvaar te word vir die kursus van sy keuse nie. Hy het egter maande tevore ʼn pamflet in die pos ontvang oor SciMathUS. Hy was aanvanklik huiwerig, maar het uiteindelik ʼn onderhoud gedoen en is vir die program aanvaar.
“In die begin was ek baie skepties oor my tyd by SciMathUS. Om al my vriende as eerstejaars op kampus te sien, besig om die ware studentelewe te geniet, het my mismoedig gemaak. Dit het egter gou verander toe ek die impak van die lesings op my manier van dink ervaar en toe ek nuwe hulpmiddels gekry het om wiskundige en rekeningkundige probleme op te los,” herroep Steyn.
SciMathUS het Steyn voorberei vir sy studies deur vir hom verbysterende studietegnieke te leer, asook hoe om angstigheid en studiestres te bestuur – alles binne ʼn veilige omgewing geskep deur die span en die wonderlike vriende wat hy gemaak het. “Daardie ondersteuning was van onskatbare waarde,” sê hy.
Steyn se loopbaanreis het afgeskop met sy droom om ʼn geoktrooieerde rekenmeester te word. Hy het egter uiteindelik gekwalifiseer as ʼn rekenmeester en sy pad opgewerk van leerlingrekenmeester tot senior rekenmeester. Al sy ervaring het gelei tot sy huidige posisie as Finansiële Bestuurder by een van die grootste regsfirmas in Suid-Afrika.
Steyn se raad aan diegene wat uitdagings ervaar in die najaag van hul droomloopbaan is om die program oopkop te betree, hard te werk en deur te druk in die moeilike tye. “Dit is maklik om moed op te gee en jou huidige situasie te aanvaar, maar dit sal jou nie aanmoedig om te groei nie,” sê hy.
As ʼn US-alumnus, moedig Steyn sy mede-alumni aan om hoop te skep vir iemand anders. “Kom ons bou ʼn gemeenskap van sterk, dapper en pligsgetroue leiers deur hulle te bemagtig met kennis en vaardighede. Ons kan dit doen deur terug te gee. ʼn Bydrae – ongeag hoe klein of groot – kan help om ʼn jong persoon op ʼn pad na sukses te plaas,” sluit hy af.
Steyn se reis getuig van die krag van deursettingsvermoë, harde werk en die belangrikheid van ʼn ondersteuningstelsel. SciMathUS is ʼn noodsaaklike program wat aan studente geleenthede bied om hul drome na te jaag en hul volle potensiaal te bereik. Dit beklemtoon ook die belangrikheid daarvan om terug te gee en ander te bemagtig om sukses te behaal.
