Dr Nabila Ismail is ʼn navorsingswetenskaplike in die Afdeling Molekulêre Biologie en Menslike Genetika in die Universiteit Stellenbosch se Fakulteit Geneeskunde en Gesondheidswetenskappe. Sy is gekies om in Junie vanjaar die 72ste Lindau Nobel-bekroningsvergadering in Lindau, Duitsland, by te woon. Sy vertel alles oor haar ervaring van hierdie toonaangewende geleentheid in die onderstaande.

Van 23 tot 30 Junie 2023 het meer as 600 jong wetenskaplikes van regoor die wêreld die 72ste Lindau Nobel-bekroningsvergadering in Lindau, Duitsland (#LINO23), bygewoon. Hierdie vergaderings is ʼn eenmalige geleentheid om met Nobelpryswenner-wetenskaplikes, jong medewetenskaplikes en die wyer wetenskaplike gemeenskap byeen te kom en met mekaar om te gaan, mekaar te verstaan, verbintenisse te vorm en mekaar te inspireer en op voed oor die ware betekenis van ʼn wetenskaplike wees in hierdie tydvak.

Om ʼn uitnodiging na hierdie vergadering te ontvang, moet wetenskaplikes jonger as 35, wat onder die top 5% in hulle klas presteer en uitnemendheid in navorsing toon, deur ʼn veelfase- aansoekproses gaan. Ek het in 2019 om hierdie vergadering aansoek gedoen en is aanvanklik vir die vergadering in 2020 aanvaar, maar laasgenoemde moes weens die Covid-19-pandemie gekanselleer word. Die uitnodiging is na die vergadering in 2023 oorgedra. Ek was een van nege Suid-Afrikaanse wetenskaplikes wat deur die Suid-Afrikaanse Wetenskapsakademie (ASSAf) gekies en geborg is om die vergadering by te woon.

Dit was vir my ʼn groot eer om as een van 635 wetenskaplikes wêreldwyd vanjaar se vergadering by te woon, en om boonop een van die 40 wetenskaplikes te wees wat gekies en opgelei is om hulle werk by die “Next Generation Science”-praatjies by die vergadering aan te bied.

Tydens die weeklange byeenkoms was die hele eiland van Lindau in ʼn wetenskap-extravaganza omskep – van lesings in die stadsteater na ontmoetings met pryswenners op straat of in ʼn restourant. Die eiland was vol lewe en het gegons van wetenskaplike diskoers en idees!

Die navorsing wat vertoon is, was divers, en ook die wetenskaplikes – daar was wetenskaplikes van 89 nasionaliteite teenwoordig! Ek kom gelukkig uit ʼn diverse agtergrond: ek is ʼn Moslem-, Indiër-, vroulike Suid-Afrikaanse wetenskaplike en ʼn moeder, en ek kon met ʼn verskeidenheid individue skakel wat by minstens een van hierdie omskrywende eienskappe aanklank kon vind.

My navorsing fokus op tuberkulose (TB), ʼn siekte wat daagliks die dood van meer as 4 000 mense tot gevolg het. Die bywoon van ʼn vergadering waar ek ander wetenskaplikes kon herinner aan die impak wat ʼn mikroörganisme kan hê, het die impak van my navorsing oor middelweerstandige TB bevestig.

 

Lees meer:

​

Foto-opskrifte:

  • Nabila Ismail saam met Nobelpryswenner, Frances Arnold (links)
  • Nabila Ismail saam met die Suid-Afrikaans gebore Nobelpryswenner, Michael Levitt (middel bo)
  • Nabila Ismail saam met Nobelpryswenner, Morten Meldal en sy vrou, Phaedra Marie St. Hilaire (regs bo)
  • Nabila Ismail se aanbieding by die “Next Generation Science”-praatjie (onder)

 

More articles