Prof Wim de Villiers, Rektor en Visekanselier van die Universiteit Stellenbosch, het Sondag 12 Maart 2023 die 45ste Kaapstad-fietstoer voltooi om fondse in te samel vir die Universiteit se Bridge the Gap‑jaarfonds.
Prof De Villiers is iemand met heelwat ervaring van fietsry en het aan talle fietsry‑byeenkomste deelgeneem, waaronder die Londen‑na‑Brighton-fietstoer. Vanjaar se Kaapstad-fietstoer was egter vir hom van spesiale belang omdat dit sy eerste fietstoer sedert die Covid‑19‑inperkings was.
Oor sy ervaring sê prof De Villiers, “Dit was ’n ongelooflike gevoel om fiets te ry saam met soveel van die Universiteit se personeel, alumni en vriende wat met soveel geesdrif ’n positiewe impak in hul gemeenskappe wil maak. Ek is dankbaar dat ek die geleentheid gehad het om te kon deelneem vir ’n saak wat my na aan die hart lê en die belangrike werk van Bridge the Gap kon ondersteun.”
Bridge the Gap is die Universiteit Stellenbosch se Jaarfonds wat die gaping tussen talent en finansiële behoefte wil verklein met finansiële ondersteuning aan studente wat finansiële probleme ondervind en daarom dalk nie hul studie sal voltooi nie. Die Fonds voorsien studiebeurse en ‑lenings aan studente in nood sodat hulle hul studies kan voortsit en hul doelwitte kan bereik.
Die Kaapstad-fietstoer is een van die grootste fietsry‑geleenthede wêreldwyd, en bring meer as 35 000 deelnemers oor die hele wêreld byeen. Die fietsrit strek oor 109 km en neem die deelnemers langs van die mees skilderagtige roetes in en om Kaapstad.
Prof De Villiers se deelname aan die geleentheid beklemtoon sy verbintenis tot steun aan die Universiteit Stellenbosch en wil verseker dat alle studente toegang tot gehalte-onderrig kry, ongeag finansiële omstandighede. Sy fondsinsamelingspogings maak ’n beduidende verskil in vele studente se lewe en bied hulle die nodige finansiële steun om sukses met hul akademiese studies te behaal.
As ’n kranige fietsryer en toegewyde leier is prof De Villiers ’n inspirasie vir die Universiteitsgemeenskap en ’n welkome voorbeeld van die waardes van uitnemendheid, diens en toewyding wat die kern van die Universiteit se missie uitmaak.
Ons wens prof De Villiers geluk met sy suksesvolle voltooiing van die Kaapstad-fietstoer en bedank hom vir sy onwrikbare toewyding aan die Universiteit Stellenbosch en ons studente.
Al is die Kaapstad-fietstoer nou agter die rug en het prof Wim die wenstreep oorgesteek, is sy fondsinsamelingspogings nog lank nie verby nie. Indien jy hom en sy harde werk wil ondersteun, doen gerus ’n skenking aan die Universiteit se Bridge the Gap‑jaarfonds via GivenGain.
Jou skenking kan ’n verskil aan die lewe van vele studente aan die Universiteit Stellenbosch maak.
Besoek https://lnkd.in/dY3pP5a
- Van links: Ferdinand Mettler, ‘n alumnus van die Universiteit Stellenbosch (US) en Future Fund-ambassadeur, Braam de Villiers en sy pa Wim de Villiers, die visekanselier en rektor van die US, en Ashraf Kagee, ‘n professor in Sielkunde aan die Universiteit Stellenbosch, wat op 12 Maart aan die Kaapstad-fietstoer deelgeneem het.
- Foto: Verskaf/William Sezoe
More articles
