Die Rektor en Visekanselier van die Universiteit Stellenbosch (US), prof Wim de Villiers, en 50 lede van die US se internasionaal bekroonde koor reis na Tokio, Japan, waar hulle op Woensdag 9 Augustus aan die ISPS Sports Values Summit-Special Edition deelneem.
Prof De Villiers en die koor is genooi deur Sy Eksellensie dr Haruhisa Handa, ‘n wêreldwye filantroop wat bekend is vir sy jarelange toewyding aan en bydraes tot openbare dienslewering en liefdadigheidsorganisasies oor die wêreld heen.
Dr Handa se ondersteuning van verskeie sake oor etlike dekades omvat die kunste en opvoeding, toegang tot gesondheidsorg, rampverligting, bemagtiging van gestremde individue deur sport, MIV/Vigs-opvoeding in Afrika, die bevordering van demokrasie, godsdienstige verdraagsaamheid, en vele meer.
Dr Handa is veral bekend as medestigter en kanselier van die Universiteit van Kambodja en dien saam met Sy Eksellensie dr Kao Kim Hourn, die huidige sekretaris‑generaal van die Vereniging van Suidoos-Asiatiese Nasies (ASEAN). Dr Handa is ook ‘n belangrike ondersteuner van verskeie universiteite in die VK, China, die VS, Australië, Japan en Suid-Afrika. Dr Handa se International Sport Promotion Society (ISPS) is die aanbieder van die ISPS Sports Values Summit-Special Edition 2023.
Die beraad bring sportlegendes soos Dan Carter (voormalige All Black), Nacho Figueras (een van die wêreld se grootste polospelers) en Steve James (Royal Australian Navy veteraan en Invictus gouemedalje‑wenner) byeen. Dié bekendes is paneellede saam met prins Harry, die hertog van Sussex, as medestigter en beskermheer van Sentebale, en maniere word bespreek hoe die krag van sport lewens kan verander, asook die impak van sport vir filantropie op die wêreldverhoog.
Prof De Villiers neem aan die paneelbespreking deel, terwyl 50 lede van die US Koor hul musikale talente tydens ‘n openingsoptrede by die beraad sal vertoon. Die US Koor is reeds die afgelope 11 jaar die wêreld se voorste gemengde amateurkoor volgens Interkultur, die organiseerders van die Wêreldkoorspele.
Prof de Villiers sê, “Ons waardeer die uitnodiging van die stigter en voorsitter van die ISPS om aan die beraad deel te neem. Dit gee die Universiteit Stellenbosch die geleentheid om betekenisvolle netwerke te bou en om tot die gesprekke met ander vooraanstaande deelnemers aan die beraad by te dra.
“Die Universiteit Stellenbosch is daartoe verbind om uitnemendheid te behaal en om kennis te bevorder in diens van die samelewing, en ek glo ons deel ‘n gesamentlike visie met dr Handa om ‘n positiewe impak op die samelewing te hê.”
Die dirigent van die US Koor, André van der Merwe, sê: “Ons is geëerd om hierdie uitnodiging te ontvang en ons is opgewonde om ‘n voorsmakie van ons Suid‑Afrikaanse kultuurskat op die globale verhoog te gee.”
- Fotograaf: Mark Cloete
