Vyftien studente van die Universiteit Stellenbosch het vandeesweek erkenning as GAUC Globale Ambassadeurs ontvang nadat hulle onlangs ‘n intensiewe internasionale program oor klimaatsverandering en globale klimaatsregulering voltooi het.
GAUC, wat staan vir die Global Alliance of Universities on Climate, is in 2019 gestig om leiding te gee in die hoër onderwyssektor se pogings om die klimaatskrisis aan te spreek. Vandag bestaan die alliansie uit 15 van die wêreld se voorste universiteite in nege lande en van regoor ses kontinente. Die Universiteit Stellenbosch is die enigste Afrika universiteit om aan die alliansie deel te neem deur middel van die US se Skool vir Klimaatstudies.
Die studente was deel van ‘n groep van 150 studente van die 15 universiteite in die GAUC alliansie om hul sertifikate te ontvang tydens die globale virtuele bekendstelling van die ‘Climate x’ veldtog. Die doel van die veldtog is om vandag se jeug voor te berei om op ‘n sistematiese en volhoubare by te dra tot globale klimaatsregering en om van die mikpunte van die Volhoubare Ontwikkelingsdoelwitte te bereik.
Gedurende die bekendstelling het Amina J. Mohammed, die Verenigde Nasies (VN) se adjunksekretarisgeneraal, gesê ons staan voor enorme uitdagings: “Ons welwees, vrede en welvaart, en die natuur op sigself, word bedreig. Die mees dringende probleme waarmee regerings tans gekonfronteer word, is uiteindelik globaal van aard, en hulle vereis globale oplossings. Die fokus van die ‘Climate x’ veldtog is ‘n uitstekende voorbeeld van so ‘n benadering”.
Die bekendstelling van die veldtog vorm deel van verskeie geleenthede in aanloop tot die 27ste Konferensie van die Partye (KOP27) tot die VN se Raamwerkkonvensie oor Klimaatsverandering wat in November in Egipte plaasvind.
Van 5 tot 9 September 2022, byvoorbeeld, vind die Afrika Streeksforum oor die Klimaat as ‘n hibriede geleentheid by die US plaas. Die forum verskaf ‘n platform vir verskeie instansies en belanghebbendes om in gesprek te tree oor die wetenskap van klimaatsverandering en die toegepaste sosiale en beleidsimplikasies daarvan vir Afrika.
In ‘n video-boodskap op die eerste dag van die forum het Prof Wim de Villiers, US Rektor, gesê klimaatsverandering het reeds ernstige gevolge in Afrika gehad: “Ons het die vaardighede en bekwaamheid om die dringendste kwessies aan te spreek, en ons baat boonop by ‘n erfenis van inheemse kennis. Met groter samewerkingspogings, kan ons as ‘n Afrika akademiese gemeenskap soveel meer gedoen kry”.
Gedurende die Afrika Streeksforum sal van die studente die resultate van hul projekte en idees om klimaatsverandering aan te spreek, aanbied, veral in terme van Volhoubare Ontwikkelingsdoelwitte soos volhoubare en veilige energie, finansiering, die natuur, biodiversiteit en voedselsekuriteit, asook aanpassing en weerbaarheid.
Die US studente is van die Fakulteite Natuurwetenskappe, AgriWetenskappe, Ekonomiese en Bestuurswetenskappe, en die Sentrum vir Volhoubare Transisies. Hulle is Kayleigh Murray (MSc Globale Veranderingsbiologie), Nosipho Gqaleni (MSc Globale Veranderingsbiologie), Olivia Jones (BScHons Globale Veranderingsbiologie), and Yenziwe Mbuyisa (MSc Globale Veranderingsbiologie), Dencia Machoko (MSc Voedsel- en Voedingsekuriteit), Duduzile Ngwenya (PhD Restorasie-ekologie), Kgomotso Morake (MSc Bewaringsekologie), Mpilo Khumalo (PhD Bosbouwetenskap), Pitjo Makelle (MSc Bosbou en Houtwetenskap), Tshegofatso Tshoke (MSc Bewaringsekologie), Johana Mapfumo (MPhil Omgewingsbestuur), Kauthar van Harte (PGDip Omgewingsbestuur), Renate van Rooyen (PGDip Ontwikkelingsfinansiering), Yonela Mngqibisa (PGDip Omgewingsbestuur), and Willem Malherbe (PhD).
Op die foto bo: Prof Guy Midgley, interim direkteur van die US se Skool vir Klimaatstudies, het die bekendstelling van die ‘Climate x’ veldtog by die US gelei, met ‘n groepfoto van almal teenwoordig na afloop van die bekendstelling op Maandag, 5 September 2022. Foto: Anton Jordaan
