Op 21 Maart het Suid-Afrikaners Menseregtedag gevier. Menseregtedag herinner ons daaraan dat menseregte, waaronder die reg op gelykheid en vryheid van diskriminasie, beskerm en bevorder moet word. Dit is dus belangrik om die vordering ten opsigte van genderbillikheid en -gelykheid op alle lewensgebiede, sport ingesluit, te erken.
Aan die Universiteit Stellenbosch is sportvroue besig om aansienlike vordering en bydraes te maak en breek steeds grense af. Die Universiteit was nog altyd verbind tot die bevordering van gelykheid en inklusiwiteit in al sy werksaamhede, sport ingesluit. Maties Sport, die Universiteit se sportafdeling, baan die weg om ʼn omgewing te skep waarbinne vroue-atlete, afrigters en steunpersoneel kan uitblink en hulle volle potensiaal verwesenlik.
Die Universiteit Stellenbosch se Hoofdirekteur: Maties Sport, Ilhaam Groenewald, sê: “By Maties Sport glo ons aan die skep van ʼn inklusiewe omgewing waarbinne alle atlete, afrigters en steunpersoneel, ongeag gender, kan floreer. Ons is trots op ons prestasies, veral dié van ons vroue-atlete, en die grense wat hulle steeds aanhou versit.”
Maties Sport implementeer programme om seker te maak dat vroue-atlete toegang tot dieselfde opleidings- en ontwikkelingsgeleenthede as hulle manlike eweknieë het. Die departement werk ook aan die afbreek van die maatskaplike hindernisse en stereotipes wat meisies ontmoedig om aan sport deel te neem.
Die Universiteit belê ook in wêreldklas geriewe en hulpbronne wat voorsiening maak vir die spesifieke behoeftes van vroue-atlete. ʼn Aantal sportgeriewe soos die Coetzenburg atletiek-, Lentelus sokker- en Danie Craven-stadion, is onlangs opgegradeer om kleedkamers en geriewe vir vroue in te sluit.
Maties Sport bied ook steun en mentorskap aan vroue-atlete om seker te maak dat hulle in staat is om hulle akademiese en sportverpligtinge suksesvol te balanseer. Dit het dit moontlik gemaak vir talle vroue-atlete in verskillende sportsoorte om die Universiteit op nasionale en internasionale vlak te verteenwoordig.
“Ons wil meer jong meisies aanmoedig om sport te beoefen en vir hulle wys dat hulle ook grootsheid kan bereik,” voeg Groenewald by. “Ons is daartoe verbind om ʼn ondersteunende en inklusiewe omgewing vir al ons atlete te voorsien, sodat hulle steeds hulle volle potensiaal kan verwesenlik.”
Die Universiteit se verbintenis tot die bevordering van gendergelykheid en inklusiwiteit in sport getuig van sy verbintenis tot menseregte. Terwyl ons Menseregtedag vier, moet ons erkenning verleen aan die belangrikheid van die skep van ruimtes waar vroue en meisies kan floreer en hulle drome bereik, ook op sportgebied.
