Barron Hufkie is ‘n man van vele talente Ons ken hom as een van Suid-Afrika se bekwaamste en bekendste televisiepersoonlikhede. Nietemin is daar ook ‘n ander, minder bekende kant aan hierdie eNCA-nuusanker, naamlik sy passie vir die wetenskap.
Barron het vir ‘n BSc-graad in Mikrobiologie en Biotegnologie aan die Universiteit Stellenbosch studeer. “Ek het nog altyd in die wetenskap belang gestel,” sê hy. “Ek glo dit is as gevolg van my nuuskierigheid. Ek het altyd vrae oor alles en hoekom dinge is soos dit is. Wetenskap speel ‘n belangrike rol in ons daaglikse lewens, en die verskillende aspekte daarvan fassineer my. Ons verstaan dit nie altyd ten volle nie, maar ons almal maak daarop staat.
Hy kon gedurende sy studie darem ook aan sy meer kreatiewe en gesellige kant uiting gee. “Ek het in my tyd by die US by die kampusradiostasie, MFM 92.6, betrokke geraak. Ek het verskeie programme, waaronder die ontbytprogram, aangebied, en is vir twee SA Radio-toennings benoem. Ek was ook die nuus-en sportredakteur.
Barron, ‘n boorling van Somerset-Oos (of KwaNojoli), skryf hierdie kant van sy persoonlikheid toe aan sy ‘uiters kreatiewe en talentvolle familie”. “My oupa was vir my ‘n enorme inspirasie en is deel van die rede waarom ek in die mediabedryf is,” sê hy. “Ek het sy passie vir tale en letterkunde bewonder, en dit het ook mý passie geword. Ook my ouers is geweldig kreatief. Jy kan seker sê dis in my DNS!”
Hy het altyd geweet dat hy in ‘n stadium tussen die wetenskap en die media sal moet kies. Die tyd om te kies het toe ook in sy finale jaar aan die US aangebreek. “Ek het in dieselfde week twee werksaanbiedinge ontvang, een van ‘n laboratorium in Kaapstad en die ander van die grootste radiostasie in die Wes-Kaap, Kfm 945. Ek het natuurlik laasgenoemde gekies, en die res, soos hulle sê, is geskiedenis.”
Na drie jaar by Kfm en toe Eyewitness News (EWN) is Barron se droom om by die televisie-uitsaaiwese betrokke te raak verwesenlik toe eTV hom as sportaanbieder vir een van hulle nuwe kanale, eEXtra, gewerf het. Hy het hom ‘n jaar later as ‘n nuusanker by eNuus op kykNet aangesluit en kort daarna na eNCA verskuif.
Hy sê wat hy die meeste van sy werk by eNCA geniet, is “om ‘n stem te gee aan die stemloses en diegene aan bewind aanspreeklik te hou”. Hy voeg by: “Ek kry ook die geleentheid om onderhoude te voer met interessante Suid-Afrikaners wat ongelooflike werk doen om hierdie land ‘n beter plek te maak. Die wete dat ek deel is van iets veel groter en dat daar soveel in hierdie wêreld is om te ervaar is wat my soggens uit die bed kry.”
Oor sy tyd by die US sê Barron: “Om by Maties te studeer gaan oor soveel meer as om ‘n universiteitstudent te wees. Dis ‘n leefwyse. Daar is soveel dinge wat ek geniet het en wat my steeds bybly: om ‘n Varsitybekerwedstryd by te woon en die Universiteitskoor in die Endler te Sien optree, die verskillende klein koffiewinkels en restaurante, om in Victoriastraat af te stap, DCM se reusemuffins … Ek dink baie studente besef nie presies hoe bevoorreg hulle is om aan die US te studeer nie.
“Ek het ook soveel verskillende mense in my tyd daar ontmoet wat my die persoon help word het wat ek vandag is, en ek is gelukkig genoeg dat baie van hulle steeds in lewe is.
“Die US ontwikkel ‘n mens beslis in ‘n afgeronde gesofistikeerde en professionele individu.”
