Die Universiteit Stellenbosch (US) was onlangs die gasheer vir die tweede Internasionale Post-TB Simposium, waar die voorste kenners op die gebied van tuberkulose- (TB-) behandeling en ‑navorsing byeengekom het om die kwessie van longgesondheid ná TB te bevorder.
“Al hoe meer bewyse kom na vore wat daarop dui dat ʼn beduidende proporsie individue die een of ander soort nagevolg, wat deur TB veroorsaak is, ná afloop van hulle behandeling vir TB ervaar. Hierdie mense benodig ondersteuning en mediese bestuur vir hulle TB-verwante morbiditeit ná afloop van TB-behandeling,” sê prof Marieke van der Zalm van die US se Desmond Tutu TB Sentrum (DTTS) en bestuurskomiteelid van die Post-TB Simposium.
Soos al hoe meer mense die TB-behandeling afhandel, raak die las van post-TB-gevolge al hoe groter. “ʼn Onlangse modelleringstudie het beraam dat 155 miljoen TB-oorlewendes in 2020 geleef het, waarvan ʼn beraamde 6 tot 10% kinders jonger as 15 jaar was en die aangepaste lewensjare vir gestremdheid met amper 50% gestyg het met die post-TB-lewe ingesluit,” verduidelik Van der Zalm.
Meer as 150 afgevaardigdes uit 31 lande en 99 instellings het die simposium bygewoon, waaronder verteenwoordigers van nasionale TB-programme, die Wêreldgesondheidsorganisasie (WGO), die Nasional Gesondheidsinstitute (NIH) en die European and Developing Countries Clinical Trials Partnership (EDCTP – vennootskap van Europese en ontwikkelende lande vir kliniese toetse).
“Die tema van vanjaar se konferensie was ‘Die lewe ná TB’ en die mikpunt was om van voorspraak, wat met die eerste simposium bereik is, na optrede in die tweede een te beweeg,” sê Van der Zalm.
Die vier hoofdoelwitte van die konferensie was:
- Voorspraak – om globale bewustheid van post-TB-gevolge aan te wakker en om gemeenskappe wat deur TB geraak word, te bemagtig
- Kennis – om die kennis oor die lewe en siektes ná TB by te werk en navorsingsprioriteite te identifiseer
- Netwerkvorming – om navorsingsmedewerking op te bou en konkrete planne vir navorsing en voorspraak op te stel
- Konsensus – om die behoefte aan die vaslegging van die uitkomste vir longgesondheid in kliniese TB-proefnemings uit te lig
Die simposium het die allernuutste aanbiedings en interaktiewe werksgroepe, onder voorsitterskap en leiding van lede van die internasionale bestuurskomitee, ingesluit. Die oorhoofse mikpunt van die bestuurskomitee is om referate voortvloeiend uit die konferensie en ander referate, soos deur die onderskeie werksgroepe besluit is, te publiseer.
Opskrif: Afgevaardigdes by die Internasionale Post-TB Simposium
