Die Kaapse prokureur Elton Rochert is ’n lewende bewys van die sêding: Moenie dat jou verlede jou toekoms bepaal nie.
Ondanks moeilike kinderjare met baie uitdagings, het Elton in 2022 sy eie firma, Rochert Prokureurs Geïnkorporeer, in Goodwood gestig.
“Ek is die tweede oudste van vyf kinders. Albei my ouers was plaaswerkers, en ons het op drie verskillende plase rondom Stellenbosch gewoon, wat beteken het dat ons baie moes trek en van skool verander.”
Hoewel daar vroeg in sy lewe baie ontwrigtings was, was hy akademies sterk. “By die Primêre Skool Weber Gedenk in Jamestown het ek in graad 5 my eerste diploma vir beste vordering verwerf. En twee jaar later het ek my laerskoolloopbaan as die beste graad 7-leerder by Koelenhof Katolieke Primêre Skool voltooi,” vertel hy. Elton het graad 8 by die Primêre Skool Bruckner de Villiers in Idasvallei op Stellenbosch begin, maar sy gesin het later na Atlantis aan die Weskus verhuis. “Aan die einde van my hoërskoolloopbaan by Hoërskool Proteus in Atlantis was ek die beste graad 12-leerder. Ek het matriek met ’n B en twee onderskeidings geslaag.”
Danksy finansiële bystand van die Universiteit Stellenbosch en die Amicus-beursfonds van Maties se Fakulteit Regsgeleerdheid kon Elton in 1994 by die Universiteit inskryf en sy droom najaag om ’n prokureur te word. “My kinderjare en politieke bewustheid het my gemotiveer om regte te studeer. Die lot van die arm en gemarginaliseerde lede van ons samelewing lê my na aan die hart,” verduidelik hy. “Ek is die US ewig dankbaar vir die broodnodige en ruim finansiële bystand wat ek ontvang het. Daarsonder sou dit onmoontlik gewees het om selfs net met my studie te begin.”
Hy het die grade BA (Regte) en LLB in onderskeidelik 1996 en 1998 voltooi en nege onderskeidings behaal. “Ek is ongelooflik dankbaar teenoor ál my wonderlike dosente, veral wyle prof Lourens du Plessis en prof Gerhard Lubbe.”
In sy finale voorgraadse jaar het hy as gevolg van sy ouers se egskeiding persoonlike uitdagings tuis ervaar. “Prof Lubbe het tot my redding gekom en gereël dat ek my halfjaareksamen ná die Junie-vakansie skryf sodat ek eers aan my gesinskwessie kon aandag gee,” onthou hy. Goeie regsadvies van wyle prof Etienne le Roux by die Regshulpkliniek het hom in daardie tyd ook dinge by die huis help uitstryk. “Ek was ’n jaar later bevoorreg om as studentekonsultant onder die uitstekende toesig van prof Le Roux te werk.”
Elton se regsloopbaan het as ’n kandidaatprokureur by Sonnenberg Hoffmann Galombik in Kaapstad begin. Hy het later as prokureur by die firma Jan S de Villiers en toe as senior genoot by Webber Wentzel Bowens aangesluit. “Ek het ook in die korporatiewe sektor gewerk as groepregsadviseur en maatskappysekretaris van ’n JEB-genoteerde maatskappy, waarvan ek later ’n uitvoerende direkteur geword het. En nou is ek direkteur van Rochert Prokureurs, waar ek in kommersiële litigasie, arbeidsreg en munisipale reg spesialiseer. Ek is ook ’n lid van die Suid-Afrikaanse Munisipale Regsforum.”
Hy is passievol oor die transformasie van die hele samelewing. Hy het by Maties aktief aan die studentepolitiek deelgeneem en het steeds ’n lewendige belangstelling in aktuele politieke sake en die sosio-ekonomiese uitdagings van die land. ’n Hoogtepunt vroeg in sy studentejare was toe hy sy rolmodel, wyle president Nelson Mandela, van aangesig tot aangesig in Atlantis kon ontmoet toe die staatshoof die dorp besoek het.
Op die vraag oor wat hom elke dag motiveer, sê Elton hy word geïnspireer deur sy geloof en die verskil wat hy in ander se lewens kan maak – hetsy op ‘n professionele of persoonlike vlak.
“Moet nooit ophou droom nie, en onthou dat harde werk altyd vrugte afwerp,” sluit hy af.
- Skrywer: Birgit Otterman
- Hierdie is die eerste uitgawe van ons tydskrif vir Matie-alumni, en dit weerspieël die stories van vele mense met unieke geeskrag.
Is jy op soek na ’n paar oplossings vir die lewe, of het jy eenvoudig nodig om weer te hoor hoe teëspoed in geleenthede omskep kan word? Lees dan gerus verder, Matie!
https://console.vpaper.ca/stellenbosch-university/always-a-matie-202301_afri/
