KENNISGEWING AAN ALLE LEDE VAN DIE KONVOKASIE VAN UNIVERSITEIT STELLENBOSCHNOMINASIES VIR VISEPRESIDENT VAN DIE KONVOKASIE
Ingevolge klousule 51 van die Statuut (2019), moet die konvokasie ‘n president, ‘n visepresident, ‘n sekretaris en twee ander lede uit Konvokasiegeledere kies wat deel uitmaak van die uitvoerende komitee. Lede van die Konvokasie van die Universiteit Stellenbosch word hiermee uitgenooi om lede te benoem om vir ‘n termyn van drie (3) jaar[1] as Visepresident te dien nadat die vorige Visepresident uit die posisie bedank het. Die termyn van die nuut verkose Visepresident sal strek vanaf 18.10.2022 – 17.10.2025. Lede van die Konvokasie word versoek om ingevolge die Prosedure vir die benoeming en verkiesing van die Uitvoerende Komitee van die Konvokasie (KLIK HIER), elektroniese nominasies in te dien vir geskikte kandidate om hierdie vakature te vul. ‘n Nominasievorm is HIER beskikbaar of kan van die Universiteit se webblad afgelaai word. Nominasies is oop vir 30 (dertig) dae en sluit op 22.9.2022. ‘n Lid kan deur een (1) voorsteller benoem word en vier (4) ander lede moet die benoeming sekondeer. Die nominasie moet vergesel word van ‘n verklaring deur die genomineerde dat hy /sy die nominasie aanvaar en hom/haar tot die verkiesingsreëls verbind, sowel as ‘n CV (opsioneel), en moet ‘n visiestelling van maksimum 100 woorde insluit. Nominasies moet voor of op die sluitingsdatum per e-pos aan verkiesings@sun.ac.za versend word. Volgens klousule 47(1) van die Statuut (2019) is alle persone aan wie ‘n kwalifikasie by ‘n kongregasie van die Universiteit toegeken is, voltydse akademiese personeel van die Universiteit, voormalige voltydse akademiese personeel van die Universiteit wat die diens van die Universiteit verlaat het as gevolg daarvan dat hulle die aftree-ouderdom bereik het, lede van die Konvokasie en mag benoem word om in die uitvoerende komitee van die Konvokasie te dien. Lede soos gelys, kan ook as voorsteller optree en die benoeming sekondeer.
