Die Universiteit Stellenbosch (US) is trots om aan te kondig dat prof Thulisile “Thuli” Madonsela, direkteur van die Sentrum vir Sosiale Geregtigheid by die Fakulteit Regsgeleerdheid, aangestel is as ‘n eksterne lid van die Verenigde Nasies (VN) se Wetenskaplike Raad vir Onafhanklike Advies oor Deurbrake in Wetenskap en Tegnologie.
Dié gesogte aanstelling deur die VN se sekretaris-generaal, António Guterres, dui op erkenning vir Madonsela se uitsonderlike bydraes tot sosiale geregtigheid, konstitusionalisme, menseregte, goeie bestuur en die oppergesag van die reg. Die aanstelling is gemaak as deel van die Raad se inisiatief om die rol van die VN as ‘n betroubare bron van data en wetenskaplike praktyke te versterk, en om onafhanklike insigte te verskaf oor die interseksie van die wetenskap, tegnologie, etiek, bestuur en volhoubare ontwikkeling. “Wetenskaplike en tegnologiese vooruitgang kan pogings versterk om die doelwitte vir volhoubare ontwikkeling (SDG’s) te bereik – maar dit gee ook aanleiding tot etiese, wetlike en politieke hoofbrekens wat multilaterale oplossings vereis,” het Guterres gesê. “My Wetenskaplike Adviesraad sal die rol van die Verenigde Nasies as ‘n gesaghebbende bron van data en bewyse versterk, en raad aan my en my senior bestuurspan verskaf.”
Madonsela sê sy was verbaas toe sy aanvanklik genader is oor die pos aangesien sy nie ‘n wetenskaplike is nie. “Ek is diep geëerd en nederig om deel te wees van die VN se Wetenskaplike Adviesraad. Hierdie aanstelling beklemtoon die belangrikheid van die bevordering van samewerking tussen die wetenskaplike gemeenskap en besluitnemers asook die aanspreek van die komplekse morele, sosiale en politieke uitdagings wat die snel-veranderende wetenskaplike en tegnologiese vooruitgang van ons tyd meebring,” sê sy. “Dit is ‘n pluimpie vir die Sentrum vir Sosiale Geregtigheid aan die US dat ons werk deur VN raakgesien is. Dit is my hoop en oortuiging dat hierdie aanstelling ons Sentrum se pogings om sosiale geregtigheid-beginsels in alle beleidskwessies aan te vul en te versterk, terwyl interdissiplinêre samewerking – veral tussen die reg, wetenskap en tegnologie – ook bevorder sal word. Ek glo dit is ook goed vir ons Universiteit, ons land en kontinent.”
Prof Wim de Villiers, US Rektor en Visekanselier, sê dié gesogte rol is ‘n bewys van Madonsela se aansienlike bydrae tot die dissiplines van die reg, menseregte en goeie regeringspraktyke. “Haar toewyding en onvermoeide pogings om sosiale geregtigheid te bevorder, veral deesdae as direkteur van die Sentrum vir Sosiale Geregtigheid, het ‘n groot impak internasionaal. As ‘n Universiteit is ons baie trots op haar vir hierdie prestasie. Ons sien uit na haar onskatbare bydraes om wêreldwyd ‘n wesenlike verskil te maak,” sê De Villiers.
- Lees die Verenigde Nasies se verklaring hier.
