Prof Thuli Madonsela, Direkteur van die Leerstoel vir Sosiale Geregtigheid aan die Universiteit Stellenbosch (US), is oorgehaal om te vertrek op ’n reis wat verder as liggaamlike toewyding strek. Sy gaan die bekende Pelgrimstog van Hoop aanpak, ’n 300 km-roete vanaf Stellenbosch tot Kaap Agulhas, om fondse vir die #Action4Inclusion-veldtog in te samel. Dié US-inisiatief het as oogmerk om registrasie vir alle studente te verseker deur hulle historiese skuld uit te wis.
Die Pelgrimstog van Hoop, ’n gewilde netwerk roetes in die Wes-Kaap, is nie net ’n lang staptog nie, maar ’n simbool van die epiese stryd wat baie Suid-Afrikaanse studente moet voer om toegang tot opvoeding te verkry. Die roete strek deur uiteenlopende landskappe en gemeenskappe, wat verdere betekenis tot Madonsela se onderneming voeg.
Die epiese stap begin oor die naweek van 19 en 20 Augustus 2023 en gaan dan voort in Oktober, vir 13 opeenvolgende dae. Die pelgrimgstog begin om 08:00 vanaf die Rynse kerk op die Braak in Stellenbosch, wanneer prof Thuli op Saterdag 19 Augustus 15 km tot in Pniel gaan stap. Die volgende dag hervat die tog om 08:00 vanaf die Pniel Museum en eindig na ’n 20 km-skof by die plaas La Provence naby Franschhoek. Hierdie ervaring word aangebied in samewerking met Visit Stellenbosch en die Pelgrimstog van Hoop.
Ons nooi ondersteuners en entoesiaste uit om by prof Thuli en ’n groep besielende leiers en entrepreneurs aan te sluit vir die loodsing van hierdie ambisieuse projek. As jy belangstel om deel te neem, is jy welkom om dit te doen, óf vir een van die dae óf vir albei.
Dit kos R600 per dag om deel te neem. Die bedrag sluit logistieke ondersteuning, ’n hoed, peuselhappies en ’n tradisionele roosterkoek vir middagete in. Ons verskaf ook vervoer terug na die vertrekpunt. Heel belangrikste: ’n Aansienlike deel van die fooi is regstreeks ten bate van die #Action4Inclusion-inisiatief.
Plekke is beperk, daarom raai ons jou aan om betyds by Quicket te bespreek as jy wil deelneem: skandeer die QR-kode op die reklamemateriaal of by hierdie skakel: https://qkt.io/Thuli
Elke tree wat prof Madonsela op hierdie reis neem, is ’n tree vorentoe na ’n toekoms waarin alle studente, ongeag hulle finansiële omstandighede, hulle opvoedkundige strewes kan vervul. #Action4Inclusion en die Pelgrimstog van Hoop getuig van die krag wat kollektiewe optrede het om kwessies van sosiale geregtigheid op te los.
Vir meer inligting, besoek gerus https://matiesalumni.com/action4inclusion/ of kontak:
Erns Grundling (Projek-koördineerder)
Email: katvis22@gmail.com
Cell: 076 971 0206
Jeanneret Momberg (Visit Stellenbosch)
Email: jeanneret@visitstellenbosch.org
Cell: 082 944 3868
