‘n Aspek van die Amerikaanse senator Robert F. Kennedy se besoek aan Suid-Afrika in Junie 1966 toe Apartheid op sy ergste was, en waarskynlik nie genoeg mediadekking ontvang het nie, was sy besoek aan Simonsberg-koshuis. Selfs terwyl hy deur Suid-Afrika getoer het, het die jong, belowende presidensiële kandidaat sy veldtog geslyp om die Withuis in die VS‑verkiesing van 1968 te haal, en sy verskyning by ‘n ander “Withuis” – dié een in Stellenbosch – is met dawerende applous begroet.
Die verhaal van Simonsberg is nie volledig sonder dat hierdie verhaal van Bobby Kennedy en sy onuitwisbare nalatenskap vertel is nie. Sy besoek aan die “Withuis” op 7 Junie 1966 bly een van die belangrikste gebeurtenisse in die geskiedenis van die koshuis, en dit is tot vandag toe ‘n bron van trots vir vele Simonsbergers.
In die tweede episode van ons alumni-reeks MATIE LEGENDS AND PIONEERS deel die joernalis en vervaardiger Bun Booyens hierdie verhaal in gesprek met Jan Louw, die koshuishoof dr Leslie van Rooi, en die studente van die koshuis.
Hierdie episode word aangevul deur argiefmateriaal wat nog nooit vantevore gesien is nie, sowel as onderhoude deur filmmakers Larry Shore en Tami Gold, die vervaardigers van die 2009-dokumentêre film RFK In the Land of Apartheid: A Ripple of Hope, wat tans op Amazon Prime gestroom word.
Die beeldmateriaal behels omvattende onderhoude met die 1966‑Primarius van Simonsberg, wyle Willem van Drimmelen. Verdienstelike krediet word aan Van Drimmelen gegee, wat die besoek gefasiliteer en in die voorafgaande weke met Kennedy gekorrespondeer het. Dit is wonderlik om te sien hoe Willem in ons video, onder regie van Jo Higgs, sy herinneringe in daardie kenmerkende baritonstem deel.
Tragies genoeg is Robert F. Kennedy op 6 Junie 1968 vermoor, nagenoeg twee jaar ná die dag van sy besoek aan Simonsberg. Alhoewel hierdie Kennedy nooit die Withuis in die VS bereik het nie, het sy besoek aan ons “Withuis” en aan Suid-Afrika ‘n beduidende impak gehad deur die saadjies te plant vir die veranderinge wat baie jare later tot stand sou kom.
Dertig jaar ná Bobby Kennedy se besoek aan Suid-Afrika, het sy vrou Ethel en ander gesinslede teruggekeer vir ‘n besoek, en dit is nog ‘n interessante verhaal, soos vertel in ons video deur Norman Cilliers (Primarius in 1995/96 en die neef van Willem van Drimmelen).
Ons hoop jy geniet hierdie episode, getiteld “Robert F. Kennedy en die Ander Wit Huis”, wanneer jy by ons aansluit vir die aanlyn vertoning op Dinsdag 17 Mei om 18:30 SAST.
Ons kom ook die aand in die eetsaal van Simonsberg bymekaar vir dié van julle wat dit persoonlik kan bywoon.
RSVP: Vir die aanlyn vertoning of om te RSVP vir die fisiese bywoning van die geleentheid stuur ‘n e-pos na alumni@sun.ac.za.
TYD: 18:00 vir 18:30
Vir meer inligting, e‑pos gerus alumni@sun.ac.za.
Jy word uitgenooi om die eerste episode van ons MATIE LEGENDS AND PIONEERS-reeks, die onderhoud met Morné du Plessis, hier te kyk.
Klik hier om jou kontak asook intekening inligting te bestuur.
More articles
