Die Universiteit Stellenbosch is besig om pogings om ʼn einde aan studieskuld te maak, te verskerp. Die Regstrust se leerstoel vir Maatskaplike Geregtigheid, die Studenteraad (SR) en die Afdeling Ontwikkeling en Alumnibetrekkinge (OAB), in vennootskap met Besoek Stellenbosch, nooi jou hartlik uit na die staptog op die #Action4Inclusion Roete vir Maatskaplike Geregtigheid wat op 16 Junie 2022 plaasvind.
Die staptog is deel van die deurlopende fondswerwingspogings om studieskuld uit te wis en die potensiaal van studente te ontsluit, sodat hulle betekenisvol tot die ontwikkeling van ons land kan bydra. #Action4Inclusion is een van die talle inisiatiewe onder die vaandel van die jaarfonds van die Universiteit Stellenbosch, Oorbrug die Gaping, wat die gemeenskap, personeel, alumni, ouers en vriende in staat stel om ons studente te ondersteun en die gaping tussen talent en finansiële behoefte te oorbring – iets waaroor ons almal omgee.
Hoewel dit ʼn fondswerwinggeleentheid vir die #Action4Inclusion-veldtog is, is dit ook ʼn geleentheid om maatskaplike geregtigheid teen die agtergrond van ons land se gekwelde verlede aan te gryp. Die geleentheid wil ook vorige ongeregtighede erken en is daarop gemik om hernude hoop, inspirasie en medewerking tussen diverse belanghebbers te bevorder.
Die #Action4Inclusion Roete vir Maatskaplike Geregtigheid sal deur kollegas, alumni, vriende en groot nyweraars bygewoon word, en ons glo dat dit ʼn unieke geleentheid bied om belangstelling in die Dwarsriviervallei, ʼn onontwikkelde gebied met ryk lewende geskiedenis, kulturele bekoring en asemrowende natuurskoon in die Stellenbosch-omgewing, aan te wakker. Die roete van 16 km bestaan tans as ʼn toeriste-aantreklikheid met die naam Reis van Hoop en Genesing, en is daarop gemik om ʼn omgewing te skep waarin al die gemeenskappe van Stellenbosch die ontsaglike voordele van ons toerismepotensiaal kan geniet. Die roete neem ʼn mens van Stellenbosch af, oor die ou Helshoogtepas tot by Pniël, en die dag sal afgesluit word deur ʼn bemoedigende hoofrede deur professor Madonsela.
ʼn Gedeelte van die opbrengs sal vir verversings tydens die staptog aangewend word, hoewel die grootste gedeelte van die opbrengs aan #Action4Inclusion geskenk sal word.
RSVP asseblief deur jou kaartjie hier te koop: https://plankton.mobi/Events/EventBooking/e129f884-10d8-ec11-80e0-0cc47a93d288
Skakelpersone:
S’thabile Duma: 065 279 5506
Thembalethu Seyisi: 072 785 3218
